Qarapaıym otbasynan shyqqan talantty jasóspirim kishkentaıynan sıfrlyq tehnologııalarǵa qyzyǵyp ósken. Ol qazir Python-da kodıt jáne oıyn serverlerin jasaıdy. Osy arqyly el boıynsha ortasha jalaqydan joǵary tabys taýyp otyr. Ulttyq statıstıka bıýrosynyń deregine súıensek, 2023 jyldyń IV toqsanynda Qazaqstandaǵy nomınaldy ortasha jalaqy 393 605 teńgeni qurǵan. Bul – IT salanyń úlken múmkindikterge jol ashatynynyń, jaqsy tabys kózi ekeniniń dáleli.
– 10 jasymda áleýmettik jeliler týraly bir fılm kórip qaldym. Sol jerdegi Mark Sýkerbergtiń oqıǵasy meni tańǵaldyrdy. Ol ınternettegi adamdar arasyndaǵy qarym-qatynastyń jańa dáýirine aınaldyrýdy jalǵyz bastaǵanyn túsindim. Bul álem meni ózine lezde tartyp aldy. Osydan keıin baǵdarlamalaýdy, atap aıtqanda, veb-ázirlemelerdi zertteýge kóshtim, – deıdi Ámir.
Onyń alǵashqy qadamy «YouTube-te» «HTML» jáne «CSS» sabaqtaryn kórýden bastalǵan. Sodan keıin Oraldaǵy «IQ Hub» robottehnıka jáne baǵdarlamalaý mektebine bara bastaǵan. Onda «Python» negizderin úırenip, sandyq salaǵa aıaq basqan. Solaı bul baǵytty barynsha zerttep, múmkindiginshe bilimin jetildire túsken. Eń qyzyǵy, munyń bári 30 myń teńgelik kýrstan bastalǵan. Ámirdiń aıtýynsha, úlken aǵasy qoldamasa, munyń bári bolmas edi. Ol anasyn baǵdarlamalaý kýrstaryn satyp alyp berýge kóndirgen. Bastapqyda úlkender ne úshin qajet ekenin túsinbeı, qarsy bolǵan. Alaıda aǵasy olarǵa kýrstyń damýǵa mańyzdy ekenin jáne bolashaqta joǵary jalaqy alatyn maman bolýǵa múmkindik beretinin aıtqan. Solaı ata-anasy sıfrlyq álemdi meńgerýi úshin Ámirdiń barlyq jaǵdaıyn jasaı bastaǵan. Bul – basqa da ata-analarǵa úlgi bolatyn is.
– Osylaısha, alǵashqy jobalardy ázirleýmen aınalysa bastadym. Iаǵnı ártúrli oıyndarǵa arnalǵan serverler (mysaly, CS: GO jáne Minecraft) jáne áleýmettik jeli chat-bottary. Kóp uzamaı «Apexnodes» hostıngin iske qostyq. Basynda kapıtal jınaqtardan alyndy. Úsh adamnan turatyn komanda jınap, odan keıin TMD elderindegi oıyn serverlerin satý jáne tehnıkalyq qoldaýmen aınalystym. Reseıden alǵashqy tapsyrys alǵan kezde qalaı qýanǵanym esimde. Ol bizge shamamen 45 myń teńge ákeldi. Keıinirek «Jaiq Hub» aımaqtyq tehnoparkiniń qoldaýymen jobany keńeıttik, – dep tájirıbesimen bólisti ol.
Isi ońǵa bassa da, izdenýdi toqtatpaǵan. Tehnoparkte oqyp, startaptardy iske qosý týraly bilimin tereńdete túsken. Qashyqtyqqa bıýdjetti qalaı durys bólý kerektigin bilip, qarym-qatynas daǵdylaryn jetildirgen.
– Kóp uzamaı eńbegimdi satyp, aı saıyn turaqty tabys ákeletin jumys tabýǵa kiristim. Ol kezde jasym 13-te edi. Sodan «Millida» kompanııasynan usynys keldi. Olar oıyn ishindegi elementterdiń tehnıkalyq ákimshisi men jasaýshysy jumysyn usyndy. Meni «Discord» arqyly ótken suhbatqa shaqyrdy. Solaı istegen basqa jobalarym týraly aıttym. Olar jobalarymdy kórip, tájirıbe almasýǵa, úıretýge daıyn boldy. Áńgimelesýde jas týraly áńgime bolǵan joq. Shamasy, jaqsy stýdııalyq mıkrofonnyń arqasynda menedjerler meni 16-da dep oılady. Tek bir aıdan keıin, jalaqy tóleý úshin ózimniń derekterimdi jibergen kezde, kompanııa meniń naqty jasymdy bildi. Biraq eshqandaı teris reaksııa bolǵan joq. Kerisinshe, jalaqyny 20 paıyzǵa ósirdi, – dedi jas talap.
Kompanııa menedjmenti oqýshynyń ýnıversıtetti bitirgen basqa mamandardan esh kem túspeıtinine qatty tań qalǵan. Bastapqyda Ámirge jumysty mekteptegi oqýmen úılestirý qıyn boldy. Muǵalimder tarapynan kóp eskertýler jasalyp, máseleler shyǵa bastady. Keıde úı tapsyrmasyn oryndaýǵa murshasy bolmady. Sol sebepti de qazir shtattan tys jumys istep júr. Kompanııada jaqsy tájirıbe jınap, 13 myń kod jolyn jazǵan. Alaıda onymen toqtap qalmaı, basqa da jobalardy iske asyryp, jańa tájirıbe alǵysy keledi.
Ámir IT biliktiligin odan ári arttyryp, bolashaqta «DevOps» ınjeneri bolǵysy keledi. Onyń aıtýynsha, mektep bitirgennen keıin mansapty damytýdyń eki joly bar. Birinshisi – Eýropa nemese AQSh-qa ketip, joǵary oqý ornyna túsý. Ekinshisi – tájirıbe jınaqtaý. Elimizdegi iri kompanııalardan taǵylymdamadan ótip, sodan keıin «Google», «Microsoft» sııaqty halyqaralyq korporasııada jumys isteýdi armandaıdy. Ata-anasy onyń jetistikterin maqtan tutady. Ol ózi de jeke basyn qamtamasyz ete alatyna rıza. Al dostary danyshpan kóredi. Biraq Ámir óz isin eshqandaı erekshelikke balamaıdy. О́ziniń sıfrlyq saladaǵy tájirıbesimen bólisip bolǵan soń, sózin «Tabandylyq pen ynta, eńbekqorlyq arqyly árkim buǵan qol jetkize alady. Eń bastysy – bastaýdan qoryqpaý jáne ózińizge sený», dep aıaqtady sózin. Bul sóziniń jany bar.
