Ǵalymdar jasaǵan bıotyńaıtqysh suıyq jáne untaq kúıinde óndiriske shyǵady. Mundaı bıologııalyq tyńaıtqysh daqyldardyń ónimin arttyryp, qorshaǵan ortaǵa eshqandaı zalal keltirmeıdi.
«Qazir topyraqtyń tuzdanýy álemde ekologııalyq ózekti máselege aınalyp otyr. Onyń saldary adam densaýlyǵyna, ósimdiktiń ónimdiligine keri áserin tıgizedi. Sony joıý úshin túrli hımııalyq ádis qoldanylady. Bul ádis tıimdi nátıje kórsetkenimen, qorshaǵan ortaǵa zııan. Jańa bıologııalyq ónim tek ekonomıkalyq turǵydan emes, sonymen qatar aýyl sharýashylyǵy salasy úshin qaýipsiz ári tıimdi. Tuzdanǵan jáne qarapaıym topyraqta mıkroorganızmderdiń qalypty mıkroflorasy bolady. Biz sol mıkroflorany bólip alyp, sonyń kómegimen tómengi sapaly kómirdi bıosolıýbılızasııalaý arqyly gýmındi zat bólip alyp, alynǵan ónimdi tyńaıtqysh retinde engizemiz. Keıin tyńaıtqyshty tuzdanǵan topyraqpen aralastyrǵanda oń nátıjesin kórýge bolady. Demek topyraqtaǵy tuzdyń konsentrasııasy azaıyp, qalypty normaǵa keledi», deıdi Qazaq ulttyq ýnıversıtetiniń kishi ǵylymı qyzmetkeri Bekzat Kamenov.
Búginde patent alý jáne kommersııalandyrý jumysymen aınalysyp jatqan ǵalymdar aldaǵy ýaqytta qorshaǵan ortaǵa zııansyz, daqyldyń ónimin ósirýge yqpal etetin jańa ónimdi naryqqa shyǵarýdy josparlap otyr.
ALMATY
