Foto: Senat
Otyrys barysynda Senat depýtattary «Qazaqstan Respýblıkasynyń keıbir zańnamalyq aktilerine bıznes júrgizý máseleleri boıynsha ózgerister men tolyqtyrýlar engizý týraly» zańdy birinshi oqylymda qarady. Bul qujat tıisti zańnamany qoǵam men bıznestiń múddelerin eskere otyryp jetildirýdi kózdeıdi.
Atap aıtqanda, kásipkerlik qyzmet jaǵdaılaryn jaqsartýǵa, bızneske ákimshilik júktemeni azaıtýǵa jáne negizsiz kedergilerdi joıýǵa qatysty ózgerister qamtylǵan. Sondaı-aq memlekettik baqylaý men qadaǵalaý tártibin retteıtin normalar da bar.
Zańnyń negizgi mindetteriniń biri – Memleket basshysynyń óńdeý ónerkásibi oryndaryn jetkilikti kólemde jáne kóńilge qonymdy baǵada otandyq shıkizatpen qamtamasyz etýge, sondaı-aq, halyqtyń áleýmettik osal toptaryna tıimdi ataýly qoldaý kórsetýdi qamtamasyz ete otyryp, áleýmettik mańyzy bar azyq-túlik ónimderiniń baǵasyn retteýden kezeń-kezeńimen bas tartýǵa qatysty jekelegen tapsyrmalaryn iske asyrý.
Jalpy, osy qujat arqyly 114 zańnamalyq aktige, onyń ishinde 12 kodekske jáne 102 zańǵa ózgerister men tolyqtyrýlar engizý kózdelip otyr.
Zań maquldanǵan jaǵdaıda memlekettik baqylaý jáne qadaǵalaý nysandaryn jańa retteýshi saıasattyń bazalyq qaǵıdattary men tásilderine sáıkes keltirý, kásipkerlik qyzmetti retteý men qorǵaýdyń tyń tetikterin engizý, bızneske ákimshilik júktemeni azaıtý jáne tutynýshylar, kásipkerlik sýbektileri men memleket múddeleriniń teńgerimin qamtamasyz etý sııaqty naqty nátıjelerge qol jetkizý kózdelip otyr.
Sonymen qatar Palata otyrysynda senatorlar depýtattyq saýaldaryn joldap, mańyzdy máselelerge nazar aýdardy.
Lázzat Qaltaeva tótenshe jaǵdaı kezinde múgedektigi bar adamdardyń qaýipsizdigin qamtamasyz etýge qatysty problemalarǵa toqtaldy. Osyǵan baılanysty depýtat birqatar shara usyndy. Olardyń qatarynda daǵdarys jaǵdaıynda olardy izdeý jáne naqty kómek kórsetý úshin múmkindigi shekteýli azamattardyń biryńǵaı derekqoryn qalyptastyrý týraly bastama da bar.
Serik Shaıdarov óndiristik jaraqat alý oqıǵalarynyń kóbeıýine jáne zeınetkerlikke shyqqannan keıin zardap shekken qyzmetkerlerdi qorǵaıtyn kepildendirilgen sharalardyń bolmaýyna alańdaýshylyq bildirdi. Osyǵan oraı senator keltirilgen zııanǵa baılanysty materıaldyq ótem óteýdi jumys berýshige júkteýdi usyndy.
Janbolat Jórgenbaev búginde aýyl halqynyń qalaǵa kóshýi artyp otyrǵanyn aıtyp, bul úrdistiń saldaryna nazar aýdardy. Depýtat osy baǵyttaǵy máselelerdi sheshý úshin Úkimetti aýyldaǵy ınfraqurylymdy damytýǵa jáne jergilikti turǵyndardyń turmys jaǵdaıyn jaqsartýǵa yqpal etýge shaqyrdy.
