«Oqýǵa qushtar mektep» jobasy, «Balalar kitaphanasy» baǵdarlamasy aıasynda ótken kezdesý balalar jýrnaldary men gazetteri arqyly kitap oqý mádenıetin nasıhattaý, oqý belsendiligin arttyrýdy maqsat etedi. Basqosýǵa «Balalar ádebıeti» baspasy, «Qazaq gazetterine» JShS-na qarasty «Ulan», «Drýjnye rebıata» gazeti, «Baldyrǵan», «Aqjelken», jýrnaldary, sondaı-aq jekemenshik «Aıgólek», «Balbulaq», «Jyl on eki aı», «Altyn saqa», «Han talapaı», «Ybyraı», «Bilim shyńy – ǵylym syry», «Aqyldy balalar», «Bilimdi ult», «Bala Bi», «Farabi shakirti», «Aqyldym», «Balaqan», «Balalar álemi», «Ertegiler áleminde», «Alan&kids», «Balapan baǵy», «Móldir bulaq», «Jeti álem», «Ertegiler elinde», «Bilim akademııasy», «Asyl sóz», «Ál Jábirdiń atasy» sııaqty otyzǵa jýyq merzimdi basylymdardyń redaktorlary, qalamgerler men qala mektepteriniń dırektorlary, muǵalimder, oqýshylar men ata-analar qatysty.
Alqaly jıyn barysynda gazet-jýrnaldardyń shyǵý tarıhy, balalardy qyzyqtyratyn taqyryptar tóńireginde qyzý pikirtalas boldy. Aqparattyq tehnologııalardyń kómegi arqyly balalarǵa qoljetimdi kontentti gazet-jýrnaldar betinde uıymdastyrý búgingi kúnniń talaby. Osy baǵytta baspasóz ónimderin meılinshe qyzyqty etip shyǵarýǵa eńbektenip júrgen redaksııa qyzmetkerleri jazylym máselesiniń ózekti bolyp turǵanyn alǵa tartty. Al jazylym kórsetkishin jaqsartý úshin muǵalimdermen qatar ata-analardyń da belsendiligi qajet.
Respýblıkalyq ǵylymı-pedagogıkalyq kitaphana dırektory Álııa Saıdembaevanyń aıtýynsha, kezdesý balalardyń kitap oqýǵa degen qyzyǵýshylyǵyn arttyrýdy maqsat etedi.
– Memleket basshysynyń tapsyrmasyna sáıkes Oqý-aǵartý mınıstrligi men Mádenıet jáne aqparat mınıstrligi tarapynan kóterilip, osy aýqymdy máseleni sheshýdiń joldary iske asyp jatqany belgili. Endigi kezekte Almatydan bastaý alǵan mańyzdy shara respýblıka óńirlerinde de jalǵasyn tabatyn bolady. Balalardyń kitapqa, gazet, jýrnaldarǵa degen qyzyǵýshylyǵyn damytý qoǵamǵa ortaq másele. Búginde baıqap qarasaq, balalardyń sózge, sóıleýge shorqaqtyǵyn baıqaýǵa bolady. Ol úshin balalardy kitap oqýǵa, qazaqtyń shuraıly baı tiliniń kórkem qasıetin tanýǵa baýlýymyz qajet. Al olardy kitap oqýǵa qyzyqtyratyn birden-bir kommýnıkasııa quraly – balalarǵa arnalǵan basylymdar, – dep atap ótti Á.Saıdembaeva.
Bıyl Respýblıkalyq ǵylymı-pedagogıkalyq kitaphana 250-den astam basylym túrine jazylǵan. Aldaǵy ýaqytta jazylym sanyn kóbeıtýdi josparlap otyrǵan kitaphana mamandary jyldan-jylǵa kelýshiler sanynyń da artyp kele jatqandyǵyn aıtady. Búginde kitaphanaǵa kelýshiler sany 6 myńnan asady. Pedagogıkalyq beıindi kitaphana qorynda qazirgi kezde gazet-jýrnal men kitapty qosqanda 400 myńǵa jýyq ekspozısııa bar. Al elektrondy kitaphana qory 3 myńnan asady.
Kitaphana qory osy joly kitap avtorlary, baspa ókilderi syıǵa tarqan jańa basylymdarmen tolyqty.
ALMATY
