«Sońǵy bes jylda 27 el jasandy ıntellektini damytýdyń ózindik tujyrymdamasyn ázirledi. El Prezıdenti osy baǵytqa basymdyq berýdi tapsyrdy. Eseptiń eki negizgi qorytyndysy: birinshisi – jasandy ıntellekt tóńkerisi boldy, ekinshisi – algorıtmder adamdardy tikeleı almastyra almaıdy. Jasandy ıntellektini, jańa tehnologııalardy ıgergen mamandar JI múmkindikterin paıdalanýǵa múmkindikteri men resýrstary joq adamdardy eńbek naryǵynan yǵystyra bastaıdy», dep atap ótti mınıstr.
Ál-Farabı atyndaǵy QazUÝ-dyń basqarma tóraǵasy-rektor Janseıit Túımebaev óz kezeginde jasandy ıntellekt dáýirinde ınnovasııalyq jobalardyń mańyzdylyǵyn atap ótti.
Ǵylymı-ınnovasııalyq kórmede QazUÝ ǵalymdary men stýdentteri jáne «Stem» ortalyqtaryndaǵy oqýshylar ózderiniń ǵylymı ázirlemeleri men startaptaryn usyndy. Jas ǵalymdardyń ınnovasııalyq jobalaryn iske asyrýǵa qoldaý kórsetý jáne naryqqa shyǵýyna járdemdesýdi maqsat etken kórme barysynda 20-dan astam ınnovasııalyq joba tanystyryldy.
Solardyń qatarynda ýnıversıtet ǵalymy Dıana Rahımova sóıleý qabileti nashar balalarǵa arnalǵan qazaq tilindegi mobıldi qosymshany tanystyrdy. Jobanyń maqsaty – jasandy ıntellektini paıdalana otyryp, oqý jáne jazý ádisi arqyly balalardyń sóıleý qabiletin jetildirý jáne damytý. Ǵalym daıyndaǵan ǵylymı jobanyń arqasynda balalar tez sóıleýdi jáne aqparattardy jedel qabyldaýdy úırenedi. Aldaǵy ýaqytta joba avtorlary mobıldi qosymshaǵa logopedterdiń vıdeodáristerin engizýdi josparlap otyr. Bolashaqta mobıldi qosymsha tolyq bitkennen keıin ata-analar tegin paıdalana alady.
QazUÝ-dyń jas ǵalymdary usynǵan jobanyń biri – ıntellektýaldy avtomattandyrylǵan aqyldy jylyjaı. Bul aqyldy jylyjaı daqyldardy ósirý prosesin jeńildetip qana qoımaı, adamdardyń jumysyn barynsha azaıtady. Iаǵnı ósimdikterdi qajetti kezde ǵana sýarý úshin jáne aýa temperatýrasyn qadaǵalaý maqsatynda arnaıy datchıkter ornatylǵan. Atalǵan datchıkter arqyly jylyjaıdaǵy jumystar zamanaýı tehnologııalardyń kómegimen júzege asady. Jobany jetildirý barysynda energııa kózi kún panelderinen alynǵan. QazUÝ-dyń 3-kýrs stýdenti, joba avtorlarynyń biri Gúlnur Qudaıbergenovanyń aıtýynsha, mundaı ǵylymı joba álemdik praktıkada bar. Al elimizde aqyldy jylyjaıdyń balamalary bolǵanymen, olar tolyq júzege asyrylmaǵan.
Forým aıasynda bos jumys oryndarynyń jármeńkesi ótti. Jármeńkege barlyǵy 35-ten astam iri kompanııalar men uıymdar qatysty. Jumys berýshiler stýdentterge ártúrli saladaǵy bos jumys oryndarynyń múmkinshilikteri týraly aıtyp berdi.
ALMATY
