El chempıondary anyqtaldy

Túrkistan topyraǵynda alǵash ret ótkizilgen el birinshiligi joǵary deńgeıde uıymdastyryldy. Jarys­tyń saltanatty ashylý rásiminde Túrkistan oblysy ákimdiginiń appa­rat basshysy Er­keǵalı Álim­qulov qatysýshy sportshy­lar­dy quttyqtap, sáttilik tiledi. Kú­res básekesine jan-jaqty qol­daý kórsetken obly­styq dzıýdo fe­derasııasynyń pre­zıdenti Ha­mıtdın Jarqynbekov el birin­shiliginiń óńirde ótýi jastardyń sport­ta shyńdalýyna kóp septigin tıgize­­tinin aıtty. Al elimizdiń dzıýdo kúre­sinen jasóspirimder arasyndaǵy aǵa jattyqtyrýshysy Meıirlan Baımahan­betov jarysqa qatysýshy sportshylar joǵa­ry daıyndyqpen kelip, tatamı tó­rinde ta­rtysty beldesýler ótetinine senim bildirdi.

Árıne, túrkistandyq jan­kúıerdiń búıregi óz óńiriniń balýanyna buıyratyny málim. Bul oraıda jarystyń alǵashqy kúninde qyzdar arasynda 48 kıloǵa deıingi salmaq dárejesinde baq synaǵan sary­aǵashtyq Symbat Taǵaı men uldar arasynda 55 kıloǵa deıingi salmaqta beldesken Ernur Batyrǵalı altyn medaldiń ıesi atanyp, jergilikti jankúıerdi qýantty. Jalpy, «Olym­pic Center» sport kesheninde ótken jarysta bozkilemge shyqqan árbir sportshynyń jeńiske jetýdi kózdegenine jankúıer ataýly kýá boldy.

Sonymen, jekeleı jarystar nátıjesi boıynsha Túrkistan oblysynyń komandasy 3 altyn, 1 kúmis jáne 1 qola júldemen jalpy medal kestesinde kósh bastady. Al Jetisý oblysy 2 altyn, 2 kúmis jáne 4 qola júldemen ekinshi orynǵa turaqtasa, Qyzylorda oblysy 2 altyn, 1 kúmis jáne 3 qola júldemen úzdik úshtikti túıindedi. Naqtyraq aıtsaq, qyzdar arasynda 40 kılo salmaqta Sevınch Abdý­kadyrova (Shymkent), Ásel Rýslanova (Atyraý oblysy, 44 kg), Symbat Taǵaı (Túrkistan oblysy, 48 kg), Fatıma Sýpýǵalıeva (BQO, 52 kg), Nuraı Jeńis (Jetisý oblysy, 57 kg), Kórkem Orynbek (Almaty, 63 kg), To­mırıs Erǵalı (Qaraǵandy oblysy, 70 kg), Nurshat Kemelhanqyzy (Jetisý oblysy, +70 kg) altynnan alqa taqsa, uldar arasynda Maǵjan Joldasbek (Qyzylorda oblysy, 50 kg), Ernur Batyrǵalı (Túrkistan oblysy, 55 kg), Baqdáýlet Qabdeshov (Almaty, 60 kg), Islam Abaı (Túrkistan oblysy, 66 kg), Shamsıdın Apak (Almaty oblysy, 73 kg), Rasýl Mýhým (Jam­byl ob­lysy, 81 kg), Sanjar Er­ulan­­uly (Qara­ǵandy oblysy, 90 kg), Dinmuhammed Nysanbaı (Qy­zylorda oblysy, +90 kg) el chempıo­ny atandy.

Túrkistanda ótken chempıonat nátıjesi boıynsha 2024 jylǵy sport maýsymynda Azııa jáne álem chempıonaty syndy básekelerde el namysyn qorǵaıtyn dzıýdodan jasóspirimder qurama komandasy jasaqtalady.

TÚRKISTAN