Oblystyq krımınaldyq polısııa basqarmasy kıber qylmysqa qarsy kúres tobynyń aǵa jedel ýákili Ashat Nurmanovtyń aıtýynsha, alaıaqtardy ustaý ońaı emes. Ásirese bank salasyna qatysty alaıaqtardy quryqtaý qıyndyq týdyrǵan.
«Byltyr ınternettegi alaıaqtyqqa baılanysty 104 qylmys sotqa joldandy. Al 276 qylmystyq is taraptardyń ózara kelisimine baılanysty qysqartyldy. Jábirlenýshilerdiń arasynda áleýmettik mártebesi ártúrli azamattar bar. Onyń ishinde bıýdjet salasynyń qyzmetkerleri, memlekettik qyzmetshiler, zeınetkerler, tipti jeke kásipkerler de zardap shekken. О́tken jyly alaıaqtar atyraýlyqtarǵa shamamen 400 mln teńgege jýyq shyǵyn keltirdi», deıdi A.Nurmanov.
Onyń aıtýyna qaraǵanda, eń jıi kezdesetin aldaý túri – ınternet arqyly «joq taýarlardy» satý nemese qyzmet kórsetý kezinde aldyn ala aqy tóletý. Bank qyzmetkerleriniń atynan qońyraý soǵatyn alaıaqtar da kóbeıgen. Onlaın-qaryzdy resimdeý arqyly jasalatyn qylmystyń úlesi úshinshi orynda tur. Sondyqtan quqyq qorǵaýshylar turǵyndarǵa árqashan saq bolý qajettigin, kez kelgen qońyraý men habarlandyrýǵa aldanyp qalmaýdy eskertedi.
Alaıaqtardyń aılasy alýan túrli bolyp otyr. Máselen, 27 jastaǵy áleýmettik jelidegi paraqshalarda páterdi jalǵa berý jóninde habarlandyrý jarııalaǵan. Osy habarlandyrýdan 20-ǵa jýyq turǵyn zardap shekken.
«Krımınaldyq polısııa basqarmasynyń qyzmetkerleri «Hi-Tech» is-sharasy kezinde kúdiktiniń «Krisha.kz» paraqshasynda páterdi jalǵa berý jóninde jalǵan habarlandyrý berip kelgenin anyqtady. Ol habarlasqan turǵyndardyń aldyn ala tólem retinde aýdarǵan qarjysyn alaıaqtyq jolmen ıemdengen. Nazar aýdaratyn bir jaıt, kúdikti telefondaǵy daýysyn ártúrli únge ózgertip, birde jas qyz, keleside orta jastaǵy áıel bolyp sóılesken. Máselen, 37 jastaǵy turǵyn kúdiktimen WhatsApp messendjeri arqyly hat almasyp, aldyn ala 50 myń teńge aýdarǵan. Sońynda alaıaqqa aldanyp qalǵan. Tergeý kezinde kúdiktiniń osyndaı 3 qylmystyq iske qatysy bary dáleldendi», dep habarlady departamenttiń baspasóz qyzmeti.
Al kıber qylmysqa qarsy kúres tobynyń qyzmetkerleri áleýmettik jelide jumysqa ornalastyrý úshin jalǵan jarnama bergen kúdiktini anyqtady. Kúdikti WhatsApp messendjeri arqyly «Denholm Zholdas» JShS-ǵa jumysqa ornalastyratyny jóninde jalǵan jarnama shyǵarǵan. Jarnama boıynsha 1970 jylǵy er adam WhatsApp jelisi arqyly kúdiktimen hat almasqan. Kúdikti er adamǵa jumysqa ornalasý úshin aldyn ala tólem tóleý qajettigin aıtyp, Kaspi Gold qosymshasynda tirkelgen nómirdi usynǵan. Er adam sol nómirge áýeli 500 myń, keıin 300 myń teńgeni bólek aýdarǵan. Saldarynan jumys izdegen azamatqa 800 myń teńge materıaldyq shyǵyn kelgen. Jedel izdestirý is-sharasy kezinde Kaspi Gold qosymshasyna tirkelgen nómirdiń ıesi anyqtaldy. Ol óz jaýabynda atalǵan aqshany 1990 jylǵy kúdiktige bergenin aıtypty.
Taǵy bir derekke toqtalsaq, Túrkistan oblysynyń turǵyny 2023 jyldyń aqpanynda Shymkent qalasynan arzan jıhaz usynyp, WhatsApp jelisinde mobıldi telefon nómirin qaldyrǵan. Bul jarnamaǵa atyraýlyq turǵyndar qyzyǵýshylyq tanytqan.
Atyraý qalasynyń turǵyndary bank qosymshasy arqyly 6 aıǵa nesıe rásimdegen. Jarnama berýshige aldyn ala tólem retinde qomaqty qarjy aýdarǵan. Máselen, Atyraý qalasynyń 1957 jylǵy turǵyny Shymkent qalasynan 24 oryndyq aldyrýǵa tapsyrys bergen. Ol 6 aıǵa 675 996 teńge nesıe rásimdep, 833 myń teńge kóleminde aýdarym jasaǵan. Alaıda tapsyrys bergen taýary jetkizilmeı, satýshymen baılanys úzilgen. Keıinnen 66 jastaǵy qala turǵynyna 1 mln 508 myń 996 teńge materıaldyq shyǵyn kelgeni dáleldengen.
Oblystyq polısııa departamenti krımınaldyq polısııa basqarmasynyń qyzmetkerleri osyǵan baılanysty jedel izdestirý is-sharasyn júrgizdi. Sóıtip, Túrkistan oblysynyń 1994 jylǵy turǵynyn anyqtaǵan. «Kúdiktiniń dál osyndaı alaıaqtyq jolmen Atyraý qalasynyń úsh turǵynyn aldap, jábirlenýshilerdiń 4 mln teńgesin ıemdengeni belgili boldy. Sotqa deıingi tergeý kezinde 29 jastaǵy kúdikti óziniń qylmys jasaǵanyn moıyndady. Atyraý qalasynyń №2 sotynyń sheshimimen kúdikti qylmystyq quqyq buzýshylyq úshin kináli dep tanylyp, 3 jyl merzimge bas bostandyǵyn shekteý jazasy taǵaıyndaldy», dep málim etti departamenttiń baspasóz qyzmetinen.
Atyraý oblysy
