Parlament Senaty apparatynyń basshysy Maksım Spotkaı men Federasııa Keńesi apparatynyń basshysy Gennadıı Golovtyń kezdesýi barysynda ózara is-qımyldy odan ári nyǵaıtý talqylaýdyń negizgi taqyryby boldy. Taraptar sondaı-aq yntymaqtastyq týraly tıisti memorandýmdy ázirleý jáne oǵan qol qoıý múmkindigin talqylady.
Maksım Spotkaı basqosýda elderimiz eki jaqty kún tártibindegi aýqymdy máseleler boıynsha barlyq deńgeıde ózara tıimdi jáne nátıjeli is-qımyldy óristetip kele jatqanyn atap ótti.
«Qazaqstan men Reseı basshylary kezdesýler men konsýltasııalardy júıeli túrde ótkizip keledi. Parlamentter arasynda da tıimdi jumys qatynasy qalyptasty. Senat tóraǵasy Máýlen Áshimbaev pen Federasııa Keńesiniń tóraǵasy Valentına Matvıenkonyń bastamasymen parlamentaralyq yntymaqtastyqty damytý jónindegi is júzindegi sharalar josparyna qol qoıylyp, tabysty júzege asyp keledi. Bizdiń kezdesý, shyn máninde, sol jumystyń jalǵasy», dedi M.Spotkaı.
Gennadıı Golov óz kezeginde parlamentter palatalarynyń apparattary arasyndaǵy ózara is-qımyldyń joǵary deńgeıin atap ótti. Ol sondaı-aq tájirıbe almasý jumysyna qarqyn berý úshin apparattardyń tıisti qurylymdyq bólimsheleri qyzmetkerleriniń ózara taǵylymdamasyn uıymdastyrýdy usyndy.
Kezdesýge qatysýshylar sonymen qatar elektrondyq qujat aınalymynda, aqparattyq júıelerde, zańnamalyq úderisterdi uıymdastyrýda jáne apparat qyzmetiniń ózge de salalarynda jańa tásilderdi qoldaný máselelerin talqylady.
