Bıylǵy sharanyń basty keıipkerleriniń biri – Qazaqstanǵa týǵan anasyn izdep kelgen Jánibek Savelev. О́tken jyldyń jeltoqsanynda elge kelip, Qazaq radıosynyń «Barmysyń, baýyrym?» habary arqyly anasyn izdegen Jánibekke qatysty júrgizilgen zerttý jumystary nátıjesinde 2001-2002 jyldary Arqalyqta dúnıege kelgen 4 balanyń týǵan anasy tabyldy.
Al Jánibektiń óz anasyna qatysty izdeý jumystary áli jalǵasýda. Sharada Jánibek týǵan halqyna alǵysyn jetkizdi.
- Týǵan anamdy izdeý osynshalyqty qıyn bolady dep oılaǵan joqpyn. Men Qazaqstanǵa kelgen kezde birden anamdy taýyp alyp, onymen kezdesemin dep josparladym. Anamdy izdeýim arqyly menen bólek 4 balanyń týǵan analary tabylǵanyna óte qýanyshtymyn. Bul men úshin motıvasııa, anamdy izdeýdi toqtatpaımyn. Qazaq jurtyna, týǵan halqyma menimen birge bolǵandary úshin úlken raqmetimdi aıtamyn! - dedi Jánibek Savelev.
