Foto: senate.parlam.kz
Depýtat balalar men jasóspirimder sıntetıkalyq esirtkiniń keń taralý qaýpine ushyraıtyn eń osal orta sanalatynyn eskertti. Onyń aıtýynsha, qaskóıler esirtkini ınternet-messendjerler arqyly arzan baǵamen satyp jastardy ýlaıdy, táýeldi etedi.
2021-2023 jyldar aralyǵynda sıntetıkalyq esirtki zattaryn taratqany úshin 1 021 adamnyń ústinen qylmystyq is qozǵaldy. Sońǵy 3 jylda sıntetıkalyq esirtkini alý kólemi 100 kg-nan 1 tonnaǵa deıin ósti. 2021 jyly 17, 2022 jyly 68 jáne 2023 jyly 81 esirtki zerthanasynyń qyzmeti anyqtaldy.
«Esirtki qaýpine belsendi qarsy turý – memleket pen qoǵamnyń eń mańyzdy mindetteriniń biri. Eldegi esirtki saýdasynyń órshýine baılanysty tikeleı Prezıdentke baǵynyshty arnaıy esirtkige qarsy qyzmet júrgizetin jeke-dara mekeme qurý múmkindigin qarastyrýdy suraımyz. Sıntetıkalyq esirtkini satýǵa qatysatyn saıttardyń jarnamalaý faktileriniń jolyn kesý jónindegi jumysty kúsheıtip, jarnamalaýshylardy qatań jazalaý qajet. Mektep, kolledjder men joǵarǵy oqý oryndarynda oqıtyn jastarǵa esirtkini taratýdyń saldary týraly túsindirý sharalaryn jandandyrý qajet. Jastar, ásirese stýdentter arasyndaǵy sıntetıkalyq esirtkini tasymaldaýshylardyń (jasyryn qoıyp ketýshi) sanynyń ósýine baılanysty naqty is-sharalar josparyn ázirleýdi oryndy dep sanaımyz», dedi G.Shıpovskıh.
