Sýretti túsirgen – Erlan OMAR, «EQ»
Aıajan Danııarqyzy búginde Qanysh Sátbaev atyndaǵy qazaq ulttyq zertteý ýnıversıtetiniń «kompıýterlik ǵylymdar» mamandyǵy boıynsha 3-kýrsta bilim alyp júr. Aıajannyń sabaqtan tys ýaqytta qusbegilik ónermen aınalysyp júrgenine 2 jyldaı ýaqyt bolypty.
Buǵan deıin ol «Sultanseri» etnografııalyq ortalyǵynyń áleýmettik jelilerge jarııalaǵan sadaqshy qyzdar kastıngine qatysyp, sol jerde tálimgeri Sultanseri Beketulynyń qustarǵa qamqorlyǵyn kórip, qos qanattylarǵa degen qyzyǵýshylyǵy paıda bolǵan. Basynda jaı ǵana ermek qylyp júrgen ol keıin osy búrkitshilik joldy tańdady. О́ıtkeni ony búrkittiń adamǵa degen baýyrmaldylyǵy, senimdiligi, qyraǵylyǵy men kúshtiligi erekshe tańǵaldyrypty. Jattyǵý kezinde alǵashqy búrkitterdiń biri Aıajanǵa qatty baýyr basyp qalǵany sonshalyq, tek sonyń ǵana buıryǵyn tyńdap, keıde tipti óz ıesine de baǵynbaıtyn bolǵan.
Keıipkerimiz qusbegilik óner arqyly elimizde ulttyq sporttyń osy túrin myqtap qolǵa alýdy josparlap otyr. Tipti ol óziniń bul óneri týraly saǵattap áńgimeleýge bar. Osy kúnge deıin Aıajan eki qusty baptap úlgergen. Jyl boıy birneshe ret búrkitshiler saıysynda alǵyrlyǵymen kózge túsip, fınalǵa deıin jetti. Qazir qyran baptaǵan qyz respýblıkalyq týrnırde jeńimpazdar qatarynan kóriný úshin baryn salyp, qyzý daıyndalyp jatyr.
