Sýretterde: Kamalov Iýsýf, Týǵalov Farýh, Armedınov Saıd.
Elimizde kóktemniń alǵashqy kúninde atalyp júrgen erekshe mereke qarsańynda Otan aldyndaǵy áskerı boryshyn atqaryp júrgen sarbazdarmen tildesip qaıtqan edik.
«Qazaqstan áý bastan tatýlyq pen dostyqtyń sımvolyna aınalǵan beıbit el ǵoı. Sonyń ishinde bizdiń áskerı bólimde alǵys aıtý kúni erekshe atalyp ótedi. El qorǵany bolatyn qarýly jasaqtyń bir-birine degen adal kóńili men ystyq yqylasy óte mańyzdy. Bólimdegi búkil tálim-tárbıe jumysynyń irgetasy osydan bastalady», deıdi «Batys» óńirlik qolbasshylyǵy baspasóz qyzmetiniń ofıser korrespondenti, leıtenant Manarbek Baqdáýlet.
Biz jaýyngerler arasynda áskerı boryshyn ótep júrgen ózge ult ókilderin kórip, olardyń oı-pikirin bilýge tyrystyq. Alǵash jolyqqan uıǵyr jigiti Kamalov Iýsýf Nurlanuly 2005 jyly Túrkistan oblysynyń Túlkibas aýdanyna qarasty Jaskeshý aýylynda týǵan eken. Qazir 5517 áskerı bóliminiń atqyshtar rotasynyń qatardaǵy sarbazy. Iýsýftyń ata-anasy da, ózi de qazaqsha erkin sóıleıdi. «Dostarym da qazaq. Orys mektebinde oqysam da memlekettik tildi bala kúnnen meńgerip aldym. Áskerge kelgenime 8 aı boldy. Ábden úırenip qaldym», deıdi jas jaýynger. Onyń aıtýynsha, osyndaı merekeler, ataýly kúnder adamdy oılandyryp, jaqsylyqty baǵalaýǵa, túrli ult ókilderi arasynda syılastyq pen tatýlyqty arttyrýǵa yqpal etedi.
«Osy bir erekshe merekeniń atalyp óte bastaǵanyna bıyl segiz jyl bolǵan eken. Bul halqymyzdyń yntymyq-birligin aıǵaqtaıtyn erekshe kún. Jalpy, alǵys aıtý – aıtqan adamnyń da, qabyldaǵan jannyń da júregine erekshe jylý syılaıtyn keremet qubylys, adamgershiliktiń joǵarǵy kórsetkishi. Jyl saıyn bul merekeniń mazmuny jańa oqıǵalarmen baıı túspek. Men de osy merekede ózimniń jyly lebizimdi balalyq shaǵymdy birge ótkizgen dostaryma, synyptastaryma aıtqym keledi. Jastyq shaǵymnyń jyly esteligi bolǵan adal dostarym meni árbir qıyn kezeńde jalǵyz tastamaı, qoldaý kórsetip, bıik belesterge shyǵardy. Árdaıym janymda demeý bolyp, ómir atty uzyn jolda serigim bolyp qazir de birge júr. Olardyń bárine alǵysym sheksiz!», deıdi «Batys» óńirlik qolbasshylyǵynyń 5517 áskerı bóliminiń qatardaǵy sarbazy Farýh Týǵalov.
Farýh Nasyrjanuly 2002 jyly Shymkent qalasy mańyndaǵy Asyq ata aýylynda tájik otbasynda dúnıege kelipti. Úıdegi týystary túgel qazaqsha sóıleıdi. Qazaq mektebinde oqyǵan, kúlli dostary qazaq. Farýh ózi oqyǵan mektep úıirmesinen dombyrany da úırenip alypty. Qazir kez kelgen otyrysta qolyna dombyra alsa, el-jurt aýzyna qarap qalady.
Dál osy 5517 áskerı bólimi atqyshtar rotasynyń sarbazy qatardaǵy Armedınov Saıd Saverdınuly da uıǵyr ultynan eken. 2005 jyly Almaty oblysyna qarasty Ketpen aýylynda dúnıege kelgen. «Bizdiń úıde de bárimiz qazaqsha erkin sóıleımiz. Aýylymyzda uıǵyr tilinde bilim beretin Májálıev atyndaǵy orta mektepte oqydym. Dostarymnyń arasynda qazaq ta, uıǵyr da óte kóp», deıdi sarbaz.
Buryn keńes kezinde «Tili basqa, tilegi bir, júzi basqa, júregi bir» degen uran bolatyn. Qazirgi jas jaýyngerlerdiń tili de, tilegi de bir ekenin kórdik. Olar búginde el tynyshtyǵynyń qalqany bolyp júrgen Ulttyq ulan, sonyń ishinde «Batys» óńirlik qolbasshylyǵynyń ujymynda Otan aldyndaǵy boryshyn abyroımen ótep júr.
Batys Qazaqstan oblysy
