Foto: akorda.kz
Qasym-Jomart Toqaevqa byltyr óńir ekonomıkasyna 568,9 mıllıard teńge ınvestısııa salynǵany týraly málimet berildi. Bul oraıda ósim 132,7 paıyz bolsa, onyń ishinde jeke ınvestısııa kólemi 131,5 paıyzǵa artqan. Jumys istep turǵan shaǵyn jáne orta kásipkerlik sýbektileriniń sany 107,1 paıyzǵa ulǵaıyp, 53,2 myńǵa jetken.
Nurlan Uranhaev 2023 jyly ónerkásip óndirisi 105,1 paıyzǵa, aýyl sharýashylyǵy ósimi 103,5 paıyzǵa, qurylys kólemi 119,1 paıyzǵa artqanyn málim etti.
Prezıdenttiń tapsyrmasyna sáıkes oblysta Áleýmettik-ekonomıkalyq damýdyń keshendi jospary iske asyrylyp jatyr. Josparda ınvestısııa kólemi 1,9 trıllıon teńge bolatyn 102 joba qamtylǵan. «Qarajyra» ken ornynda kómir-hımııa keshenin jáne qýaty 1 GVt bolatyn úshinshi jel elektr stansııasyn salý jobalary pysyqtalyp jatyr.
Shekara mańyndaǵy óńiraralyq yntymaqtastyqty damytýǵa erekshe kóńil bólinedi. QHR-dyń Shyńjań-Uıǵyr avtonomııalyq aýdanymen birlese otyryp, ınvestısııalyq jobalar jáne shekaradan ótkizýdiń ýaqytsha pýnktin salý týraly ýaǵdalastyqqa qol jetkizildi. О́ńir týrızminiń damýyna serpin beretin «Semeı – Tachen (Sháýeshek)» áýe reısin ashý jumystary júrgizilip jatyr. Sondaı-aq Tatarstan Respýblıkasymen yntymaqtastyqty damytýdyń jol kartasyna qol qoıyldy.
Budan bólek, Memleket basshysyna úshinshi jylý elektr ortalyǵy qurylysynyń tehnıkalyq-ekonomıkalyq negizdemesin ázirleý barysy jóninde baıandaldy. Aldyn ala esepke sáıkes, josparlanǵan jylý qýaty 1200 Gkal/saǵatty jáne elektr qýaty 360 MVt-ty quraıdy. Sondaı-aq óńir turǵyndaryn taza aýyzsýmen tolyq qamtamasyz etý úshin 46 jobany iske asyrý qarastyrylǵan.
«Jaıly mektep» ulttyq jobasy aıasynda 2025 jylǵa deıin 5700 oqýshyǵa arnalǵan 11 mektep salý josparlanǵan. «Aýyldyq densaýlyq saqtaýdy jańǵyrtý» ulttyq jobasyn iske asyrý sheńberinde 2025 jylǵa deıin oblysta alǵashqy medısınalyq-sanıtarlyq kómek kórsetetin 65 nysan salynady. Olardyń quny 10,8 mıllıard teńgeni quraıdy.
Kezdesý sońynda Qasym-Jomart Toqaev oblysty odan ári damytý jáne turǵyndardyń ál-aýqatyn arttyrý jóninde birqatar tapsyrma berdi.
