Qalqansha bezin emdeýdiń biregeı ınnovasııalyq ádisin jasaýǵa Astana qalasynan arnaıy kelgen ıntervensııalyq onkoradıolog Nııaz Malaev jetekshilik etti. Buǵan deıin mundaı otanyń birneshe túrin jasaǵan bilikti maman óz tájirıbesimen bólisip, ınstıtýt mamandaryna tyń tásildiń artyqshylyqtary týraly dáris ótkizdi.
Ota jasalǵan naýqastardyń biri 47 jastaǵy túrkistandyq bolsa, ekinshisi Jambyl oblysynyń 43 jastaǵy turǵyny. Mamandar qalqansha beziniń túıindik túzilimderin emdeýdiń aıryqsha ádisi sátti ótkenin, aldaǵy ýaqytta ınstıtýt qabyrǵasynda mundaı otalardy jasaý qolǵa alynatynyn jetkizdi.
«Bizdiń klınıkada terapııalyq beıindegi pasıentter, sonyń ishinde qant dıabeti, qalqansha beziniń aýrýlary jáne t.b. naýqastarǵa medısınalyq kómek kórsetiledi. Qalqansha beziniń qatersiz túıinderin emdeýdiń biregeı, az ınvazıvti ádisi - radıojıilikti ablasııany engizý bizdiń pasıentterge hırýrgııalyq aralasýsyz qalqansha beziniń túıindik túzilimderinen arylýǵa, ómir súrý sapasyn jaqsartýǵa múmkindik beredi. Biz Astana qalasynyń Ulttyq ǵylymı medısınalyq ortalyǵynyń dárigeri, áriptesimiz Nııaz Beısenulyna qoldaý kórsetkeni úshin rızashylyǵymyzdy bildiremiz», deıdi ǴZI Basqarma tóraǵasy Marat Pashımov.
Joǵaryda aıtyp ótkenimizdeı, eki naýqasqa da ýytty emes bir túıindi zob dıagnozy qoıylǵan. Bul fýnksııanyń buzylýynsyz qalqansha beziniń qatersiz patologııasy. Sımptomdar túıinniń kólemine jáne onyń ornalasýyna baılanysty órbip, kosmetıkalyq aqaý, tynys alý men jutýdyń qıyndaýy, tamaq ishý kezinde yńǵaısyzdyq seziný, daýystyń ózgerýi sııaqty qolaısyzdyqtardy týyndatýy múmkin. Al jarty saǵat ishinde júzege asatyn ınnovasııalyq ádisten keıin naýqas dertinen qulan taza aıyǵady.
«Densaýlyqtyń adamǵa berilgen úlken nyǵmet ekenin denemizdi dert dendegende ǵana biletinimiz ókinishti. Mundaıda úmit artarymyz – aq halatty abzal jandar. Osynaý erekshe ádisti jasatýǵa arnaıy Túrkistan oblysynan keldim. Bári sátti ótip, kóńilim jaılanǵan jaǵdaıy bar. Dárigerlerge, medbıkelerge, maǵan qoldaý bildirgen árbir janǵa shyn kóńilden alǵys aıtam», deıdi Túrkistan oblysynyń turǵyny Oıdın Týrehanova.
Osy ýaqytqa deıin Qazaqstanda qalqansha beziniń qatersiz túıindik isikterin hırýrgııalyq alyp tastaýdy qamtıtyn standartty terapııa qoldanylǵan. Qalqansha bezin ablasııalaý prosedýrasyn naýqastar jaqsy ótkeredi. Prosess shamamen 30 mınýtqa sozylady. Prosedýradan keıin shamaly aýyrsynýdyń paıda bolýy qosymsha aýyrsynýdy basýdy qajet etpeıdi. Radıojıilikti ablasııa qaýipsiz. Bul ádistiń artyqshylyǵy – az ınvazıvtilik jáne prosedýranyń qysqa merzimdiligi, jaqsy terapııalyq áser jáne asqynýlardyń bolmaýy.
«Radıojıilikti ablasııa - isik tinine áser etýdiń zamanaýı ádisteriniń biri. Onyń maqsaty - isikti tolyǵymen joıý, osy áserdiń nátıjesinde qalqansha bez túıinderiniń patologııalyq jasýshalary joıylady, bezdiń saý tinderi zaqymdalmaıdy. Bul ádis qalqansha beziniń túıinderin hırýrgııalyq alyp tastaýǵa tamasha balama bolyp tabylady», dep atap ótti Nııaz Beısenuly.
Kardıologııa jáne ishki aýrýlar ǴZI endokrınologııa kafedrasynyń meńgerýshisi m.ǵ.k., MD PhD Laýra Danıarovanyń aıtýynsha, naýqas hırýrgııalyq aralasýdan bas tartqan kezde, qalqansha beziniń qatersiz túıinderi 3,0 sm-den asqanda, qysylý belgileri men estetıkalyq problemalar týyndaǵanda ınnovasııalyq ádistiń kómegine júgingen abzal. Sondaı-aq atalǵan ádisti quramynda 70%-dan astam kıstalyq komponent, irgeles organdardyń qysylýyn týdyratyn ósip kele jatqan túıinder bar barlyq derlik qatty jáne aralas qatty kıstalyq túıin túzilimderine jasaýǵa bolady. RJA prosedýrasynyń aldynda túıindik túzilim bıopsııasy jáne sıtologııalyq zertteý qajet.
Aldaǵy ýaqytta ǴZI bul baǵytta arnaýly mamandar daıarlaýdy jáne kórsetkishter men qarsy kórsetilimderdi eskere otyryp, qalqansha beziniń qatersiz túzilimderin RJA júrgizýdi josparlap otyr.
ALMATY
