Bıylǵy maýsymnyń shymyldyǵyn «Astana» men «Jeńis» arasyndaǵy kezdesý ashty. Elordalyq qos komandanyń básekesinde Grıgorıı Babaıannyń shákirtteri 2:0 esebimen jeńiske jetti. 10-mınýtta Ýsman Kamara gol soqsa, 62 mınýtta Elhan Astanov dopty torda týlatty. Qyzylordadaǵy Saıyn Muratbaev atyndaǵy stadıonǵa jınalǵan jankúıerler úıine kóńili qulazyp qaıtty. Sebebi ózderiniń súıikti komandalary «Aqtóbege» laıyqty qarsylyq kórsete almady. Bul oıynda Idrıs Ýmaev dýbl avtory atanyp, Maksım Samorodov bir márte mergendik tanytty. «Qaısardyń» sapynan Toqtar Jańǵylyshbaı ǵana nysanany dál kózdedi – 1:3. Sol kúni Taldyqorǵanda «Jetisý» men «Aqsý» kúsh synasýǵa tıis edi. Biraq eń sońǵy sátte qarjylyq jaǵdaıdyń qıyndyǵyn alǵa tartqan aqsýlyqtar chempıonatqa qatysýdan bas tartty.
Kelesi kúni taǵy tórt básekeni tamashaladyq. Almatydaǵy Ortalyq stadıonda «Qaırat» «Qyzyljardy» qabyldady. Birinshi kezeń aıaqtalar tusta Joao Paýlo esep ashty. 63-mınýtta Tımýr Mýldınov tarazy basyn teńseltti. 71-mınýtta Gıorgı Zarıanyń soqqan goly arqyly almatylyqtar jeńiske jetti – 2:1. Semeıdiń «Elim-aıy» men «Atyraý» Pavlodarda sheberlik baıqasty. Bul básekede esep ashylǵan joq – 0:0. Shymkentte qar japalaqtap jaýyp turǵanyna qaramastan «Ordabasy» men «Shahter» arasyndaǵy kezdesý qyzyqty ótti. Alań ıeleri qaraǵandylyqtardyń qaqpasyna jaýapsyz bes dop soqty – 5:0. Bul goldardyń avtorlary – Igor Plastýn, Shohboz Ýmarov, Djasýrbeka Iаhshıboev, Zlatan Shehovıch jáne Sergeı Malyı.
Birinshi týrdyń sońǵy matchy «Tobyl» men «Turannyń» arasynda ótti. Bul oıynda qostanaılyq klýbtyń sapyndaǵy legıonerler – Ahmed Ál-Messaýdı men Davıd Enen túrkistandyqtardyń qaqpasyna jaýapsyz eki gol soǵyp, óz komandalaryna jeńis syılady – 2:0.
