Jalpy 50-ret sahnalanyp otyrǵan qoıylymnyń ıdeıa avtory – Qazaqstannyń eńbek sińirgen ártisi, Memlekettik syılyqtyń laýreaty Maıra Muhamedqyzy, kompozıtory – Mádenıet salasynyń úzdigi, halyqaralyq baıqaýlardyń laýreaty, Tasqyn Jarmuqamet. Lıbrettosyn jazǵan – Qazaqstannyń eńbek sińirgen qaıratkeri Ashat Maemırov, qoıýshy-rejısser – Mıhaıl Pandjavıdze, qoıýshy-dırıjer – Mádı О́mirzaqov, qoıýshy-sýretshi – Baqyt Kúzembaev. Teatr dırektory Maıra Muhamedqyzynyń aıtýynsha, qoıylymdy kıeli qala kórermenderine usynýdaǵy bir maqsat – óńirimizge jan-jaqtan kelgen týrısterge dástúrli tarıhı mádenıetimizdi tanystyrý.
«Domalaq ana» operasyn sahnalaý egemen elimiz úshin tarıhı oqıǵa, jańa beles bolyp otyr. Qazaq tarıhyndaǵy aty ańyzǵa aınalǵan abyz analarymyzdyń ishinde qasıetti «Domalaq ana» týraly oqıǵa tarıhı shyndyǵynyń moldyǵymen daralanyp turatyn shyǵarmalardyń biri ekendigi sózsiz. Analarymyzdy ulyqtamaı, ulylardy dáriptemeı uly ónerdi jasadyq deý artyq», deıdi Maıra Muhamedqyzy.
Qazaq halqynyń ózine tán qasıetti ana beınesi «Domalaq ana» operasynda tereńdikpen jetkizilgen. Jas qyz Nurılanyń ana atanyp, ósıet pen rýhanı qundylyqtarǵa jáne meıirimge toly ǵumyry arqyly ana mahabbatynyń qýaty shynaıy kórsetilip, sýretteledi. Opera tek analyq qaısar júrek pen qalyń elge taraǵan keńpeıildilikti aıshyqtap qana qoımaı, qazaq halqynyń tarıhynda mańyzdy oqıǵalardyń qozǵaýshysy bolǵan Báıdibek batyrdyń óz halqyna degen súıispenshiligimen bir arnaǵa toǵysyp, qazaq eliniń mádenı kórkemdigin keńinen qamtıdy. Qoıylym sońynda kórermen óner ujymyna zor qoshemet kórsetip, rızashylyǵyn bildirdi.
Aıta ketelik, Túrkistan mýzykalyq drama teatry naýryz aıynda ónersúıer qaýymǵa «Farıza» dramasyn, «Kelinder kóterilisi» komedııasyn jáne «Bórte» tarıhı dramasyn usynady.
TÚRKISTAN
