Bekzatqa ókpe joq

Dańqty Nurmagomedovter dınastııasy ókiliniń osy sport túrin serik etkenine segiz jyl boldy. Sol aralyqta 16 kezdesý ótkizip, barlyǵynda jeńiske jetti. Toǵyz básekede aıqyn basymdyq tanytty. Ýmardan utylǵandar arasynda bizdiń Sergeı Morozov ta bar. Osydan úsh jyl buryn Ábý-Dabıdegi dodada ol otanda­symyzdy ekinshi raýndta «qyl­ǵyndyrý» ádisimen utty. Taǵy bir aıta keterligi, 28 jastaǵy Ýmar – dańqy jer jarǵan Habıb Nur­magomedovtiń nemere inisi. Al týǵan aǵasy Ýsman da – naǵyz «sen tur, men ataıynnyń» ózi. Ol – Bellator promoýsheniniń chempıony. 2020 jyldyń shilde aıynda jer-jahandy jaılaǵan koronavırýs dertinen kóz jumǵan áıgili bapker Abdýlmanap Magomedulynyń osy shákirtteriniń birde-bireýi áli de jeńilistiń kermek dámin tatqan emes.

Bekzat ta – osaldar sanaty­nan emes. 26 jastaǵy qandasy­myz 18 jekpe-jektiń bi­reýin­de ǵana utyldy. 2020 jyldyń qazan aıynda ol oıda-joqta qyrǵyzstandyq Sultan Joldashbekke jol berdi. 17 je­ńisiniń 15-inde Almahan aıqyn basymdyq tanytty. Tarqatyp aıt­saq, 13 qarsylasyn uryp shy­ǵyp, eki retinde «qylǵyndyrý» tásilin qoldandy.

Keshegi Las-Vegastaǵy jarysta kórermenderdiń sport keshe­nin basyna kóterip, aıǵaıǵa basqandaryna qarap, Ýmar Nurmagomedovti qoldaý úshin búkil Da­ǵystan Amerıkaǵa kóship kelgendeı áserde boldyq. Biraq bul jaǵdaı qandasymyzǵa esh áser etken joq. Azýly qarsylasymen ol aıanbaı aıqasty. Negizinde Bekzat tik turyp tóbelesýdi qalady. Al grepplıngi óte kúshti Ýmar kú­restiń ádisine júginýdi qup kórdi. Qap taýynyń qyrany qazaqtyń ulyn qaıta-qaıta jyǵyp alyp, erkin kósilýine múmkindik bermedi. Jerde jatyp arpalysqan sátterde Nurmagomedov Almahandy birne­she ret «sabmıshn» tásilderin qol­danyp, «qaqpanǵa» túsirgisi keldi. Desek te qazaq sportshysy barlyq qaýiptiń betin qaıtardy. Sońǵy raýndqa deıin sozylǵan saıystyń qorytyndysynda tóreshiler Ýmar­dy jeńimpaz dep tanydy.

Bekzat Almahan Las-Vegastaǵy jarysta jeńilis tapsa da, oǵan ókpe aıtqan eshkim joq. Birinshiden, bul – qandasymyzdyń UFC-degi tusaýkeser kezdesýi. Ekinshiden, álemdegi eń beldi promoýshenniń prezıdenti Dana Ýaıt ony birden óte myqty sportshyǵa qarsy shyǵardy. Shyny kerek, jeńil salmaqta óner kórsetip júrgen «men» degen jigitterdiń deni Nurmagomedovpen jekpe-jekke shyǵýǵa júreksinedi. О́z­gelerdi aıtpaǵanda, top-10-dyqqa kiretin faıterlerdiń ózderi daǵystandyqtyń esimin estise, tóbe shashtary tik turady. Al Bekzat bolsa, Ýmarmen kúsh sy­nasýdan bas tartqan joq. Uıym­dastyrýshylar tarapynan usynys túskende birden kelisimin berdi. Oktagonda ol azýly ári qarýly qarsylasymen esh aıanbaı aıqasty. Sol sebepti de qazaqtyń qaısar uly dúıim jurttyń qoshemetine bólendi. Eń bastysy, ol óziniń jú­rekti jigit ekenin moıyndatty. Ýaqyt oza Bekzattyń UFC-de tó­belesip júrgen talaı sańlaqtardy sa­baıtynyna qylaýdaı da kúmá­nimiz joq.