Foto: qaz-media.kz
Zań jobasy Memleket basshysynyń «Ádiletti Qazaqstannyń ekonomıkalyq baǵdary» atty Joldaýyn iske asyrý aıasynda ázirlendi.
Qazirgi ýaqytta el azamattarynyń 8,5 mln-ǵa jýyǵy qaryz tólep otyr. Onyń ishinde 1,6 mln-ǵa jýyq azamat qaryzǵa belsheden batyp, nesıesin ýaqytynda óteı almaı júr. Nesıeni tóleý merzimi 90 kúnnen keshikken qaryzdyń jalpy somasy shamamen 1,7 trln teńgege jetti.
Atalǵan zań jobasynda bankter men mıkroqarjy uıymdary tarapynan áli ótelmegen tutynýshylyq nesıeler boıynsha 90 kúnnen asqan bereshegi bar tulǵalarǵa syıaqy esepteýge tyıym salý kózdelip otyr. Sondaı-aq nesıe ótemegen merzimi 90 kúnnen asatyn azamattarǵa kepilsiz tutynýshylyq nesıeler berýge tyıym salynýy múmkin. Dese de bul norma jeke tulǵanyń qaryzyn óteý úshin bankten beriletin qaryzǵa qoldanylmaıdy.
Sonymen qatar, qujatqa qaryz alýshynyń nesıe boıynsha aı saıynǵy tóleminiń resmı tabysynyń jartysynan aspaýy týraly talap engizilgen. Bul talapty bankter men mıkroqarjy uıymdary saqtaýǵa mindetteledi. Zań qabyldanǵan jaǵdaıda tutynýshylyq kredıt uǵymy engizilip, normatıvtik deńgeıde onyń eń joǵary máni shekteledi (bankter úshin – 5 mln teńge, mıkroqarjy uıymdary úshin – 2 mln teńge).
