Eksport • 07 Naýryz, 2024

Munaı tranzıtiniń kólemi artady

100 ret

kórsetildi

2 mın

oqý úshin

Qazaqstan «Aqtaý – Baký – Tbılısı – Jeıhan» baǵytyndaǵy munaı tranzıtin bıyl 1,5 mln tonnaǵa jetkizbek. Bul jóninde Energetıka mınıstri Almasadam Sátqalıev Baký qalasynda áriptesi – Ázerbaıjannyń Energetıka mınıstri Parvız Shahbazovpen kezdesýi kezinde málimdedi.

Jomart OSPAN

Qazaqstan men Ázerbaıjan arasyndaǵy saýda-ekonomıkalyq yntymaqtastyq jónindegi birlesken úkimetaralyq komıssııanyń 20-otyrysynyń qorytyndysy boıynsha ótken kezdesý barysynda taraptar elderdiń energetıka, munaı tranzıti, jańartylatyn energııa kózderiniń aýqymdy jobalaryn iske asyrý salasyndaǵy yntymaqtastyǵyna qatysty birqatar máseleni talqylady.

Aıta keteıik, 2022 jyly Prezıdent Qasym-Jomart Toqaev Transkaspıı dálizi boıynsha munaı tasymaldaý kólemin arttyrýdy tapsyrǵan bolatyn. Soǵan sáıkes 2022 jyldyń qarasha aıynda «QazMunaıGaz» UK AQ men Ázerbaıjan Respýblıkasynyń «SOCAR» memlekettik munaı kompanııasy arasynda «Aqtaý – Baký – Tbılısı – Jeıhan» baǵytynda munaı tranzıti týraly kelisimge qol qoıyldy.

2023 jyly Aqtaý portynan «Baký – Tbılısı – Jeıhan» baǵytynda jóneltilgen munaı 1 057 myń tonna boldy. Al bıyl qazaqstandyq munaıdy BTD arqyly tasymaldaýdy 1,5 mln tonnaǵa jetkizý josparlanyp otyr.

«QazTransOıl» AQ baspasóz qyzmetiniń habarlaýynsha, 2024 jyldyń alǵashqy aıynda Aqtaý porty arqyly tasymaldanǵan qazaqstandyq munaı eksportynyń kólemi 287 myń tonnany qurady. Onyń ishinde Aqtaý portynan Baký portyna qaraı munaı tasymaldaý kólemi 60 myń tonnaǵa artyp, 116 myń tonnany qurady.

Buǵan deıin Úkimet Teńiz, Qarashyǵanaq jáne Qashaǵan ken oryndaryn keńeıtý jobalary júzege asyrylyp jatqanyn málimdegen edi. Keıingi ýaqytta munaı tasymalyn ártaraptandyrý, Eýropaǵa baǵyttalǵan munaıdy Reseıdi aınalyp ótip tasymaldaý máselesi barynsha ózekti bolyp otyr. Aldaǵy eki jylda Transkaspıı baǵytymen munaı tasymaldaý 3 mln tonnaǵa deıin jetkiziledi. Joba kezeń-kezeńimen júzege asyrylady.

«Bizdiń ulttyq kompanııalarymyzdyń aldyna Qazaqstanda óndiristiń ósýin eskere otyryp, munaı jetkizý kólemin ulǵaıtý mindeti qoıyldy. Osyǵan baılanysty biz qazaqstandyq munaıdy jetkizý kólemin ulǵaıtýdy josparlap otyrmyz», dep atap ótti kezdesý barysynda A.Sátqalıev.

Energetıka mınıstrliginiń basshylary Kaspıı teńiziniń túbine tereń sý kabelin tóseý arqyly Kavkaz óńiri men Ortalyq Azııanyń energııa júıelerin qosýǵa baǵyttalǵan jobany iske asyrý jónindegi alda atqarylar jumystardy da talqylady.