Alqaly jıyndy júrgizgen Ulttyq ǵylym akademııasynyń prezıdenti Aqylbek Kúrishbaev Memleket basshysynyń Ulttyq ǵylym akademııasyn reformalap, onyń búgingi zaman talabyna saı maqsaty men mindetin qaıta aıqyndaýdy qoldap otyrǵanyna basa nazar aýdardy.
«Memleket basshysy Q.Toqaev ǵylym salasyn damytýǵa asa zor kóńil bólip otyr. Sonyń nátıjesinde jańadan Ǵylym jáne joǵary bilim mınıstrligi, Prezıdent janyndaǵy Ǵylym men tehnologııalar keńesi quryldy. Ulttyq ǵylym akademııasyna jańa mártebe berilip, ǵylym salasyn qarjylandyrý 3 esege artty. Ǵylym salasyna kórsetilgen qoldaý ǵalymdar qaýymdastyǵyna úlken mindet júkteıdi. Osy oraıda Ulttyq ǵylym akademııasyn táýelsiz, ákimshilik emes, mınıstrlikterdiń mindetterin qaıtalamaıtyn, Úkimetke saraptamalyq tujyrymdar beretin jáne forsaıttyq izdenister jáne de tehnologııalyq boljamdar negizinde otandyq ǵylymnyń strategııalyq damý baǵyttaryn anyqtaıtyn organǵa aınaldyrý mindeti tur. Sondaı-aq ǵylymı izdenisterdiń álemdegi aldyńǵy qatarly ǵylymı ortalyqtary men mektepteriniń tájirıbesine negizdelgen jańa formatyn usynatyn bolamyz. Ulttyq ǵylym akademııasy el ǵylymynyń ıntegrasııalanǵan júıesin jasap, memleketimizdegi ǵylym áleýetiniń qoryn quratyn bolady. Sonymen qatar ǵylym salasyna talantty jastardy tartýǵa meılinshe yqpal etemiz», dedi ol.
Jıyn barysynda Qazaqstan ǵalymdary odaǵynyń prezıdenti Orazaly Sábden, Qazaqstan Ekonomıkalyq ǵalymdar akademııasynyń prezıdenti Rahman Alshanov, Qazaqstan ulttyq jaratylystaný ǵalymdar akademııasynyń birinshi vıse-prezıdenti Vladımır Shkolnık, Aýylsharýashylyǵy ǵylymdary akademııasynyń prezıdenti Tilektes Espolov, Halyqaralyq Reprodýktologııa akademııasynyń prezıdenti Vıacheslav Lokshın sóz alyp, Ulttyq ǵylym akademııasynyń jańasha qadamyna qoldaý bildirip, ózderiniń naqty usynystaryn aıtty.
Sondaı-aq ǵylymdy damytýdyń ózekti máselelerin kótergen ǵalymdar «Ǵylym jáne tehnologııalyq saıasat týraly» zań jobasyn jetildirý, ǵylymı jobalardy, ónertabystardy óndiriske engizý, ǵalymdardyń mártebesin kóterý men qarjylandyrýǵa qatysty tushymdy oılaryn ortaǵa saldy.
Jıyn sońynda Ulttyq ǵylym akademııasy men salalyq jáne qoǵamdyq akademııalar yntymaqtastyq memorandýmyna qol qoıdy.
ALMATY
