Jasy 40-qa taıap qalsa da, áli de jastardy «japyryp» júrgen Aleksandr Shlemenkonyń esimin estimegen jankúıer joq-aý, sirá! Ombynyń týmasy sportttyq mansabyn 2004 jyly bastady. 20 jyl ýaqyt aralyǵynda 78 ret aıqas alańyna shyǵyp, 62 márte mereıi ústem boldy. 32 kezdesýde qarsylasyn esinen tandyrdy. 15 ret utylyp, bir básekede teń esep tirkeldi. Reseıdiń jekpe-jek sheberleri arasynda «Shtormnyń» esimi dańqy jer jarǵan Fedor «Sońǵy ımperator» Emelıanenkomen qatar atalady.
Aleksandr ár jyldary Vener «Bashqurt» Galıev, Robert «Býbba» Makdenıel, Braıan Rodjers, Vıtor Vıanna, Maıkel «Big Rig» Falkan, Iаsýbı Enamoto, Melvın «Aıaýsyz» Manhýff, Aleks «Kovboı» Olıveıra jáne taǵy basqa sańlaqtardy sabady. Sondaı-aq Ronaldo «Jakara» Soýza, Ektor Lombard, Tıto «Jaman jigit» Ortıs, Gegard «Assaın» Mýsası jáne Magomed «Jyrtqysh taz» Ismaılovqa ese jiberdi. Árıne, ondaı ataqtary alysqa jaıylǵan jampozdardan utylý Shlemenkonyń bedeline esh nuqsan keltirmegeni anyq.
Orta salmaqtaǵy Ombynyń oǵlany 2010 jáne 2011 jyldary Bellator promoýsheniniń Gran-prı týrnırinde eki ret top jardy. 2013-2014 jyldar aralyǵynda sol uıymnyń chempıondyq ataǵyn ıelendi. Aleksandr Shlemenko basqa da beldi promoýshenderde kúsh synasyp, talaı ret altyn belbeýdi beline taqty.
Al qazaqtyń erke uly Qýat – eshkimnen qaımyqpaıtyn naǵyz jaýjúrektiń ózi. Danııar Qasqaraýov jetekshilik etetin «Alash Praıd» klýbynda qanattanǵan «Naımannyń» ámbebaptyǵy sonshalyq, ol oktagonda tóbelesip qana qoımaı, kıno men jarnamaǵa túsedi, «razborkalarǵa» barady, án salady, ara-tura saıasatqa da aralasady. Qýattyń basqa da kópshilik bile bermeıtin jaqsy qyrlary kóp. Qashanda halyqtyń joǵyn joqtap, shyndyq úshin shyryldap júretin qazaqtyń ór minezdi óreni bul aıqasqa «bes qarýyn asynyp» attanatyny anyq. Sebebi Aleksandr Shlemenkony utý ońaı bolmaıdy. Chelıabidegi jekpe-jekte biz Hamıtovqa sáttilik tileımiz.
