Foto: elements.envato.com
Júıeli tekserýge Qazaqstanǵa ákelingen júk kólikteri men avtobýstardy zańsyz esepke qoıý faktileriniń jıileýi túrtki bolǵan. Máselen, 2023 jylǵy tamyz aıynan beri osyndaı zańsyzdyqqa barǵandardyń ústinen 23 qylmystyq is qozǵalǵan. Osy ister boıynsha 3 myńǵa jýyq avtokólik zańsyz tirkelgen. Al memleketke kelgen zalaldyń kólemi 14 mıllıard teńgeden asqan.
Qarjylyq monıtorıng agenttigi, Sıfrlyq damý mınıstrligi men «Azamattarǵa arnalǵan úkimet» ókilderi birlese ótkizgen jıynda alaıaqtar kólikti zańsyz tirkeý úshin 4 negizgi shemaǵa súıenetinin anyqtady.
«Qazirgi kezde aqparattyq júıelerdiń ıntegrasııasy tolyǵymen jasaldy. Sonyń arqasynda VIN engizý kezinde avto týraly barlyq derekter avtomatty túrde aqparattyq júıeden tartýǵa jáne tólenýge jatatyn alymdar men tólemderdi esepteýge múmkindik bar», dedi Sıfrlandyrý vıse-mınıstri Asqar Janbakın.
Prosess barysynda alǵashynda derekterdi HQO mamandary engizedi. Júıe jańartylǵanda aqparattar avtomatty túrde jańarady.
