Foto: Aqorda
«Radıkaldy neofıttar halqymyzdyń saltynda joq kıim úlgileri arqyly da jat dinı ıdealdardy qoǵamǵa tańýǵa tyrysyp júr. Bul bizdiń dástúrli uǵymdarymyz ben qundylyqtarymyzǵa jasalyp jatqan ashyq shabýyl ekeni anyq. Biz babalarymyzdyń san myńjyldyq dinı ilimi men rýhanı baǵdaryna arqa súıeýimiz kerek. Elimizdiń rýhanı derbestigin saqtap, ony nyǵaıta túsemiz desek, túrki halyqtarynyń kópshiliginiń, sonyń ishinde qazaqtardyń dástúrli dini – sýnnıttik baǵyttaǵy hanafı mázhabyna den qoıýymyz qajet», dedi Prezıdent.
Prezıdent dúnıege aqyl-parasatpen qaraý jáne erkin oılaý sekildi hanafızmge tán qasıetter ıslam órkenıetiniń qaıta órleýine jol ashqanyn, sondaı-aq bizdiń óńirde óner-ǵylymnyń órkendeýine jáne Ál-Farabı sııaqty uly oıshyldardyń tarıh sahnasyna shyǵýyna yqpal etkenin aıtty.
«Islam dininiń Uly dala tórinde taralyp, tamyr jaıýyna orasan zor úles qosqan, túrki álemindegi sopylyq ilimniń negizin qalaǵan Qoja Ahmet Iаsaýı muralaryn tereń zerdelep, dáripteýge de aıryqsha nazar aýdarǵan jón. Bul másele boıynsha eń áýeli óz elimizdiń jáne sheteldiń ǵalymdaryn shaqyryp, arnaıy sımpozıým ótkizý qajet. Osy oraıda Iаsaýı kesenesine qatysty kóne jádiger týraly aıta ketkim keledi. Islam elderinde áıgili din qaıratkerleriniń beıiti mindetti túrde japqyshpen jabylady. Mádınadaǵy Muhammed Paıǵambardyń qabiri de osylaı búrkelgen. Bul – Islam órkenıetiniń dástúri. Al qasıetti Túrkistandaǵy Iаsaýı qabirinde kópten beri arnaıy japqysh joq. Talaı zamannan kele jatqan kóne japqyshty qalpyna keltirý jumysy biraz jyl buryn bastalyp, aıaqsyz qalǵan. Men quzyrly memlekettik organǵa osy qundy murany tezirek sapaly jóndeýden ótkizip, tarıhı ornyna qaıtarýdy tapsyramyn», dedi Memleket basshysy.
Prezıdent sóılegen sózinde halqymyzdyń rýhanı negizin qurmetteı otyryp, memleketimizdiń zaıyrly el retindegi mártebesin kúsheıte túsýimiz kerek ekenin atap ótti.
«Qazaqstan óziniń memlekettiligine jáne qoǵamdyq moralyna qaıshy kelmeıtin dinı nanym-senimderdiń, túrli tanymdar men ilimderdiń bárine túsinistikpen qaraıdy. Biraq biz batystyń, ıa bolmasa basqa da kózqaras ıeleriniń yqpalymen tól mádenıetimizge jat ári álemniń dýalıstik negizine kereǵar qundylyqtardy nasıhattaýshylardyń jetegine erip kete almaımyz, ketpeımiz de!
Destrýktıvti nasıhattarǵa bizdiń elimizdegi balalar da ilesip ketip júr. Sondyqtan munyń zardap-zalaly óte zor bolýy múmkin. Tarazy basynda óskeleń urpaqtyń rýhanı jaǵynan saý-salamatty bolý máselesi tur. Bizdiń osyǵan qatysty ustanymymyzǵa saıası ahýal da, jer júzinde sánge aınalǵan jańa úrdister de áser ete almaıdy», dedi Qasym-Jomart Toqaev.
Sondaı-aq Prezıdent dástúrli otbasy qundylyqtary týraly toqtaldy.
«Biz dástúrli otbasy qundylyqtaryn tabandy túrde ornyqtyra berýimiz qajet. Islam qaǵıdalaryn óreskel burmalap, qatyp qalǵan dogma retinde qabyldaıtyn otbasylardaǵy áıelderdi kemsitý, tipti qorlaý faktilerine erekshe nazar aýdarǵan jón. Mundaı otbasylardyń turmys-tirshiligi ǵylym men tehnıkanyń jetistikterine toly XXI ǵasyrdyń ómir saltyna múlde úılespeıtin soraqy tyıymdar men tártipterge negizdelgen. Keıbir adamdar ádeıi keri ketýdi qalap, orta ǵasyrlarǵa tán eski tanym-túsinik pen is-áreketke boı uratyn sııaqty kórinedi», dedi Memleket basshysy.
