Sýretti túsirgen – Dmıtrıı Erofeev
AQSh-tyń Qazaqstandaǵy tótenshe jáne ókiletti elshisin jergilikti ájeler ansambli qarsy alyp, delegasııa múshelerine ánnen shashý shashty. Muqanshy aýylynyń turǵyndary qazaq halqynyń qonaqjaılylyǵyn kórsetip, dástúrge saı kútip aldy.
«Ochaq» turaqty damý ortalyǵy balalarǵa aǵylshyn tilin úıretý maqsatynda amerıkalyq grant baǵdarlamasymen ashylǵan. Búginde ortalyqqa 80 bala tirkelgen. Olar aǵylshyn tilinen bólek, munda birneshe mádenı úıirmege qatysyp júr. Jıynda jastar elshimen aǵylshyn tilinde erkin áńgimelesip, suraqtaryn qoıdy.
Is-shara aıasynda «Ochaq» turaqty damý ortalyǵy» QB basshysy, zań ǵylymdarynyń doktory, professor Sarqytbek Moldabaı qonaqtardy qoǵamdyq birlestiktiń qurylý tarıhymen tanystyrdy. Ǵımarattyń qurylysy men qyzmetine sholý jasady. Ol 4-N amerıkalyq oqytý baǵdarlamasyn iske asyrýdy josparlap otyrǵanyn aıtyp, bul máselede ádistemelik kómek alýǵa daıyn ekenin jetkizdi.
Aıta keteıik, 4-H halyqaralyq baǵdarlamasy 1902 jyldan bastap 50-den astam elde jumys isteıdi. Joba praktıkalyq oqytý arqyly jastardyń azamattyq, kóshbasshylyq, jaýapkershilik jáne ómirlik daǵdylaryn damytýdy kózdeıdi. Bul baǵdarlama aýylsharýashylyq salasymen tyǵyz baılanysty. Sonymen qatar salamatty ómir saltyn nasıhattaýǵa, ǵylymdy, tehnıkany jáne tehnologııany damytýǵa baǵyttalǵan.
Jalpy atalǵan ortalyqtyń negizgi maqsaty aýyldyń ekologııalyq, ekonomıkalyq jáne áleýmettik máselelerdi sheshýge járdemdesedi. Sondaı-aq aýyl turǵyndaryn turaqty damý múddesinde keshendi qoldaý kórsetýimen de mańyzdy. Ulttyq meıramnyń ústine túsken amerıkalyq qonaqtar Jetisýdyń jaısań jurtyna rızashylyǵyn bildirip, tarqady.
Jetisý oblysy
