Jańa formatta jańǵyrǵan mereke

Bul kúndi Amal dep te ataıdy. Buryn­ǵynyń kónekózderi «Toqsan shyqpaı, toń jibimes» dep saqalyn saýlap otyratyn. Qystyń qyrtys qabaǵyn kún raıyna qarap baǵamdaıtyn babalar sáýegeıligi beker emes edi. Naǵyz naýryz aıy endi týyp, jyl basynyń jańarý retinde toılanatyn merekeni respýblıka bolyp qarsy aldyq.

Joǵaryda aıtqandaı, Amal kúnin toı­laý­ǵa jınalǵan astanalyqtarǵa aqsaqaldar men el úlkenderi ataýly kúnniń ult úshin ma­ńyzdylyǵy, babalardan qalǵan dástúrdiń jań­ǵyrýy týraly aıtyp, el men eldi jaqyndastyratyn kúnniń erek­sheligi týraly aıtyp berdi.

– Qasıetti Ramazan aıymen qatar kelgen – Amal kúniniń jal­py­halyqtyq sıpat alǵany qýan­tady. Bul – qardyń kóbe­si sógilip, kóktem lebin ala keletin kún. Osynaý meıramda jerdiń tońy jibigendeı adamdar arasyndaǵy ókpe-renish te umytylyp, baýyrmaldyq arta túsedi. Úlkenge sálem berip, bata alý joralǵysy jandanyp, saǵynǵan aǵaıyn kórisip, maýqyn basyp, amandyǵyn bildirip, ózara bir-birimen qaýyshady. El Prezıdenti Qasym-Jomart Toqaev bul kúnniń mártebesi zor ekenin aıtyp ótti. Qazir jer-jerde Amal kúni toılanyp, muny jurt yqylaspen qoldap jatyr, – deıdi ǵalym, memleket jáne qoǵam qaıratkeri О́mirzaq Ozǵanbaev.

Keshte aýyz bekitken aǵaıynǵa arnaıy das­tarqan jaıylyp, bata berildi. Sondaı-aq ult­tyq kıim kıip kelgen qonaqtar arasynda saıys ótkizilip, oǵan arnaıy júlde tigilipti. Jas jigitter gir tasyn kóterip, kúsh synasty. Dastarqan basynda dástúrli án men terme aıtylyp, qarııalardyń tanymdy áńgimesi de úzilmedi.

– Astanada Kórisý dástúrin 2010 jyldan beri bastadyq. Bul merekeniń tek batys óńir­lerde toılanǵany belgili ǵoı. Basynda on shaqty otbasy edi, búginde 70-ke jýyq otbasy osy merekeni birlese atap júrmiz. Munyń aǵa býyn men keıingi urpaqty sabaqtastyra otyryp, salt-dás­túr­di jańǵyrtý, eldi birlikke shaqyrý, aýyzbirlikke úndeýde mańyzy zor. Biz atamyzdan jáne ákemizden kórgen osy merekelik dástúrdi óz balalarymyzdyń, nemerelerimizdiń da boıyna da sińirip kelemiz. Búgingi keshke de arnaıy babalar dástúrin kórsin, kóńiline túısin dep ertip ákelgenderdiń qarasy mol, – deıdi qala turǵyny Dáýletbaı Sútbaıuly.

Mádenıet jáne aqparat mı­nıstr­ligi bıylǵy Naýryz meıramyn toılaýdyń tujyrymdamasyn jarııalaǵan edi. Mádenıet komıteti tóraǵasynyń orynbasary Sábıt Barlybaevtyń aıtýynsha, osy jyldan bastap Naýryz merekesi jańa formatta toılanady. Budan bylaı jyl saıyn 14-23 naý­ryz aralyǵynda Naýryznama onkúndigi ár túrli taǵylymdy is-sharamen ótkiziledi.