Kóktem kelisimen elorda kóshelerine qar sýy jaıyldy. Tipti keı bólikterinde qarǵyn sý joldarǵa jaıylyp, jaıaý júrginshilerdi bylaı qoıǵanda, kólik qozǵalysyna kedergi keltirip jatyr. Buǵan alańdaǵan belsendiler qolda bar quralymen áli erı qoımaǵan qala buryshtaryn qardan tazalap álek.
– Biz búgin tabıǵatpen birge qalamyz da jańarsyn degen nıetpen úlken saıabaqtardyń qaryn arshyp, tazartýǵa kúsh salyp otyrmyz. «Jumyla kótergen júk jeńil» demekshi, qoldan kelgendi istep, bir-birine qamqor, tileýles bolý tárbıede bar. Bul bir jaǵynan jastardyń boıyndaǵy ekomádenıetti qalyptastyrýǵa sep bolady, – deıdi «Qazaqstan stýdentter alıansy» tóraǵasynyń orynbasary Saǵyndyq Seıitkárim.
Dál osyndaı ekologııalyq aksııa Batys Qazaqstan oblysynda da jalǵasty. Oral qalasynda ótken senbilikke qala turǵyndary, qoǵamdyq birlestikter, stýdentter, jastar jáne tabıǵat janashyrlary qatysty. Jınalǵandardyń jalpy sany 350-den asty. Olar Shaǵan ózeniniń janyn qýraǵan aǵashtardan tazartyp, jol jıegindegi qoqystardy, aǵash synyqtaryn jınady. Is-sharada Batys Qazaqstan oblysynyń ákimi Narıman Tóreǵalıev te boı kórsetti. О́ńir basshysy senbilikke qatysýshylarǵa alǵysyn bildirip, qala ákimdigimen jaýapty mekemelerge qalany tazartý jumystaryn kúsheıtýdi tapsyrdy.
– Memleket basshysynyń tapsyrmasyna sáıkes Naýryznama onkúndigine oraı óńirimizde kóptegen is-shara ótti. Jańarý kúninde senbilikke shyqqan jandarǵa alǵysym sheksiz. Shaǵan ózeniniń eki jaǵynda qýraǵan, qulaǵan aǵashtar kóp. Tazartý jumystary aqpan aıynda bastalyp, qulaýǵa jaqyn turǵan aǵashtar kesildi. Qýraǵan aǵashtardan biz ýaqtyly qutylýymyz kerek. Jalpy alǵanda, tıisti mekemeler shaharymyzdy tazartý jumystaryn kúsheıtýi qajet. Ulttyq qundylyqtardy dáriptep, óskeleń urpaqqa durys tálim-tárbıe bergen jón. Olardy tazalyqqa úıretý kerek. Sol baǵytta uıymdastyrylǵan osy senbiliktiń paıdasy kóp, – deıdi N.Tóreǵalıev.
Al Almaty oblysynyń ortalyǵy Qonaev qalasy men barlyq aýdanda «Birge – taza Qazaqstan!» ekologııalyq aksııasy aıasynda 16 myń túp aǵash kósheti otyrǵyzyldy. Jalpy, oblystyq senbilikke 25 myńnan astam adam qatysypty. Qonaev qalasynyń jastary men memlekettik mekeme qyzmetkerleri kól jaǵalaýyndaǵy demalýshylar kóp keletin oryndar men saıabaqtardy, kóshelerdi abattandyryp, «Barys» monýmentiniń mańaıyn qoqystan tazartty.
– Qazirgi tańda ekologııalyq problemalar – óte ózekti jáne kúrdeli másele. Sol turǵyda «Birge – taza Qazaqstan!» aksııasynyń negizgi maqsaty – tabıǵı resýrstardy únemdi, maqsatty, sapaly paıdalaný máselesine erekshe kóńil bólip, qorshaǵan ortaǵa baılanysty ekologııalyq problemalardy halyq bolyp, qoǵam bolyp sheshý. Naýqan 5 jyldan beri turaqty túrde jylyna eki ret uıymdastyrylyp keledi, – deıdi oblystyq ekologııa departamentiniń basshysy Qonysbek Eskendiruly.
Kún jylynyp, qara jer kóringen soń, elimizdiń ár óńirinde ekoaksııalardyń qatary kóbeıetini anyq. Osy rette «Astana jastarynyń» belsendileri jyl saıyn saıabaqtarǵa kóshetter otyrǵyzýǵa járdemdesip, tarıhı oryndardy tazalaý jumystaryn júrgizetinin aıtty.
– Biz «Jer saǵaty» aksııasyn ótkizdik. «Jer saǵaty» – Dúnıejúzilik tabıǵat qory (WWF) uıymdastyratyn jyl saıynǵy jahandyq halyqaralyq is-shara. Naýqan jyl saıyn naýryzdyń sońǵy senbileriniń birinde ótedi. Sebebi bul kúni belgilengen ýaqytta álemniń ártúrli elderindegi adamdar bir saǵatqa jaryq pen basqa da elektr quraldaryn óshiredi. Mundaǵy maqsat – jer sharyndaǵy klımattyń ózgerýi problemasyna álemdik qaýymdastyqtardyń nazaryn aýdarý, osy ekologııalyq máseleni sheshýde birigip jumys isteý qajet ekenin alǵa tartý. Aldaǵy ýaqytta qaladaǵy kóshetterdiń sanyn kóbeıtý maqsatynda 20 sáýir men 20 mamyr aralyǵynda «Ulttyq aǵash otyrǵyzý» naýqany bastalady. Igi isti 20 qyrkúıek pen 20 qazan aralyǵynda da qaıta jalǵastyramyz. Al maýsymda «Halyqaralyq orman eriktileri mektebi» jobasy iske qosýdy josparlap otyrmyz, – deıdi volonter Alan Baltabaıuly.
