Foto: Berdibolat Kórkembaev
26 naýryz saǵat 18.45-te Severnyı kenti, Proletarskaıa kóshesi boıynda qar sýyn toqtatý úshin joldyń jıegine qum tóselip, sý sorǵysh motopompalar men jyljymaly stansııalar jumyldyrylǵan. Sonymen qosa jol boıynan aryq qazylyp, sýdyń baǵyty buryldy. Atalǵan iske barlyǵy 50 adam, 13 tehnıka tartý nátıjesinde jol ústinen úılerge qaraı qulaǵan sý ekpini toqtatyldy.
Qumar Irgebaıuly Arqalyq qalasy ákimdiginde kórshiles Amangeldi, Jangeldın aýdandary ákimderiniń qatysýymen beınejıynda mán-jaıdy naqtylap, oǵan Arqalyq qalasy boıynsha kóktemgi sý tasqynyna qarsy sharalar týraly qala ákimi Ámirhan Asanov aqparat berdi.
Arqalyq qalasyna qarasty Ekidiń, Ábdiǵappar han aýyldarymen baılanystyratyn kóterme joldyń sýaǵar qubyrlary erigen qar sýyn ótkizip úlgere almaǵandyqtan 25 naýryzdan bastap atalǵan aýyldarmen qatynas úzilgen. Ekidiń aýylynda 258 turǵyn bar, aýyldaǵy 49 úıdiń 23 -ne sý kirip, 10 úı búlindi. Eki qystaýdyń turǵyndary qaýipsiz jerge shyǵaryldy. Ábdiǵappar han aýylynda 276 turǵyn bar, 2 úıdiń turǵyndary qaýipsiz jerge shyǵaryldy. Qaıyńdy aýyldyq okrýginiń Qyzyljuldyz aýylynyń 185 turǵynyn qaýipsiz jerge shyǵarýǵa 3 avtókólik jiberildi. Qaıyńdy aýyldyq okrýgine qarasty 4 sharýa qojalyǵy ornalasqan qystaýda 14 adam qaýipti jaǵdaıda otyr. Atalǵan eki aýylda da júkti áıelder men medısınalyq esepte turatyn naýqastardy qaýipsiz jerge shyǵarý, aýyl turǵyndaryn azyq – túlikpen, dári – dármekpen qamtý sharalary júrgizildi.
Arqalyq qalalyq ákimdigi janynan 4 mobıldi top qurylyp, 8 motopompamen turǵyndardan túsken shaǵymdar boıynsha sý sorǵytý jumystaryn júrgizip jatyr. Kómekke Qostanaı oblysy Tótenshe jaǵdaılar departamenti jasaǵy 50 adam, 3 tehnıka, 1 tirkemeli motopompa, Qaraǵandy qalasynyń áskerı bólimshesinen 50 adam, 3 tehnıka, Qostanaı qalalyq Tótenshe jaǵdaılar departamentinen 2 tehnıka men 5 adam jiberilgen.
Oblys ákimi qaýipti jaǵdaıda qalǵan turǵyndardy jedel túrde qaýipsiz aımaqqa shyǵarýǵa tapsyrma berdi. Bul úshin Qorǵanys mınıstrliginen 4 tikushaq járdemge kelgen.
«Adamdar túnge deıin tolyq qutqarylýy tıis. Tótenshe jaǵdaıdan zardap shekken birde bir turǵyn óz máselesimen jeke qalmaýy qajet», dedi oblys ákimi Qumar Aqsaqalov.
Sondaı-aq qala jáne aýdan basshylaryna aldaǵy ýaqytta kóktemgi sý tasqynyna jiti daıyndalýǵa pármen berdi.
