Palata otyrysynda Lýkın 2020-2023 jyldar aralyǵynda Qazaqstanda altynnyń zańsyz aınalymyna qatysty 7 qylmystyq is tergelip, onyń 4-i sotqa jiberilgeni týraly statıstıkalyq málimetterdi keltirdi. Keltirilgen shyǵyn 1,5 mıllıard teńgeden asty.
«Bas prokýratýranyń málimetinshe, sońǵy 4 jylda zańsyz aınalymǵa, baǵaly metaldardy óndirýge jáne urlaýǵa qatysty 133 qylmystyq quqyq buzýshylyq tirkelgen», dedi Lýkın.
Mysal retinde depýtat zańsyz óndirilgen altyn ónimderin satyp alýmen aınalysqan qylmystyq top músheleri 2023 jyldyń qarashasynda qamaýǵa alynǵanyn aıtty.
«Keıinnen jer asty sehtarynda bul altynnan belgili brendterdiń atyn jamylyp, Astana men Shymkent saýda úılerinde satylǵan ónimder shyǵaryldy. Tintý kezinde 1 keliden astam altyn men 100-den astam zat tárkilendi», dedi senator.
Parlamentar mundaı zań buzýshylyqtarmen kúresý úshin altyn kenishterindegi baqylaýdy kúsheıtý kerek dep sanaıdy.
«Boljam boıynsha, zańdy túrde óndirilgen árbir úsh tonna altynǵa bir tonna zańsyz óndirilgen altyn qosylyp otyrdy. El boıynsha bul - jylyna shamamen 25 tonna zańsyz óndirilgen altyn. Bul máseleni sheshýdiń basty sharasy - nysandardaǵy baqylaýdy kúsheıtý. Bul qosymsha beınebaqylaý kameralaryn ornatý, shahtany talshyqty-optıkalyq arnalarmen jabdyqtaý, tekserý júıelerin paıdalaný, avtomatty anyqtaý sensorlaryn engizý jáne basqa da qaýipsizdik sharalaryn qamtıdy», dedi senator.
Eske salaıyq, buǵan deıin Saýda jáne ıntegrasııa mınıstrligi el azamattary altyn satyp alý kezinde aldanyp jatqanyn habarlaǵan edi.
Qyrmyzy JUMAǴALIQYZY,
EUÝ stýdenti
