Oblystyq aýyl sharýashylyǵy basqarmasynyń málimetine súıensek, búgingi kúnde ylǵal jabý, tyrmalaý, sebý jumystary júrgizilip jatyr. Bıylǵy ónimge qajetti 57,7 myń tonna jazdyq daqyldar tuqymy daıarlanyp, sapasy zerthanalyq tekserýden ótkizilip jatyr. Osy jylǵa 11,5 myń gektar qant qyzylshasyn sebý josparlansa, oǵan qajetti 16,1 myń sebý birligi kólemindegi tuqym tolyǵymen qamtamasyz etiledi, sonyń ishinde 9,6 myń sebý birligi Kóksý qant zaýytynda, 6,1 myń sebý birligi «Jetisý» ÁKK-de qarastyrylǵan.
«Qazirgi kezde 444 sharýashylyq 10,7 myń tonna mıneraldy tyńaıtqysh satyp aldy. Sondaı-aq qoımalarda 3 049 tonna mıneraldy tyńaıtqysh bar. Kóktemgi dala jumystaryna 4124 tonna dızel otyny bólindi, onyń bir lıtriniń baǵasy - 250 teńge. Kóktemgi dala jumystaryna tartylatyn 23 myń birlik tehnıkanyń daıyndyq deńgeıi - 99%. Sol sııaqty bıyl qant qyzylshasyn ósirýge baǵyttalǵan 8 servıstik-daıarlaý ortalyǵy quryldy. Jergilikti bıýdjetten bólingen 2,5 mlrd teńgege sepkish, japyraq jınaǵysh, kombaın sııaqty 62 birlik jańa aýyl sharýashylyǵy tehnıkalary alynyp jatyr. Budan bólek, «Qazagroqarjy» fılıalyna 2,2 mlrd.teńgege 106 ótinim túsip, 70 sharýashylyqqa 1,4 mlrd.teńgege 131 birlik aýyl sharýashylyǵy tehnıkasy alyndy. Oǵan qosa kóktemgi dala jumystaryna «Agrarlyq nesıe korporasııasy» 61 sharýashylyqqa 948 mln teńge nesıe berdi», delingen Jetisý oblystyq aýyl sharýashylyǵy basqarmanyń habarlamasynda.
Bekitilgen lımıtke sáıkes osy jyldyń vegetasııalyq kezeńine 1,3 mlrd tekshe metr sý berý josparlanǵan. Qazirgi kezde sý qoımalaryna sý jınaý jumystary jalǵasyp jatyr, ortasha tolymdylyǵy - 76%. Vegetasııalyq kezeńine 208,7 kılometr sý arnalary tazartyldy, jyl sońyna deıin qosymsha 274,8 kılometr arnalar tazartylady.
Jalpy kóktemgi dala jumystary josparǵa sáıkes júrgizilip jatyr, onyń barysy turaqty baqylaýǵa alyndy.
