Sýretti túsirgen – Dmıtrıı Erofeev
Oblys ortalyǵynda bir sátte 50 sábıdiń tusaýy birdeı kesildi. О́ńir ákimi baspasóz qyzmetiniń málimetine súıensek, sábılerdiń tusaýyn óńirdegi ardagerler, mádenıet, óner, ádebıet jáne jýrnalıstıka salasynyń qaıratkerleri, ataqty sportshylar, bilikti dárigerler men ustazdar, memlekettik qyzmetshiler, t.b kópke tanymal bedeldi azamattar kesken. Bul aýqymdy jıyn elimizde alǵash ret ótkizilip otyrǵandyqtan, Qazaqstannyń rekordtar kitabyna engizildi. Tusaý kesý rásimine oblys ákimi Beıbit Isabaev qatysyp, táı-táı basqan búldirshinderdiń qadamyna qut tiledi.
Rýhanı is-shara shymyldyǵy búldirshinderge bata berý saltanatymen túrildi. Osy rásimge arnaıy kelgen «KInES» Rekordtardy tirkeý departamentiniń dırektory Baqytjan Tastúlekov tańdanysyn jasyrmady.
«Elimizde osyndaı aýqymdaǵy tusaýkeser alǵash ret ótkizilip otyr. Bul kún – elimiz úshin aıshyqty sáttiń biri. Sondyqtan 50 balanyń bir mezette birdeı tusaýkeseri ótkizilgeni jaıly faktiniń Qazaqstannyń rekordtar kitabyna engizilgenin rastaıtyn sertıfıkat tabystaımyn. Balalardyń joly ashyq, ár qadamy izgilikke tolsyn», dedi B.Tastúlekov.
Tusaýkeser rásiminen keıin atalǵan departament basshysy oblystyq qoǵamdyq damý basqarmasyna arnaıy sertıfıkat tabystady. Sonymen qatar Qazaqstannyń rekordtar kitabynyń sońǵy shyǵarylymyn syıǵa tartty. Osy kúni alǵashqy táı-táı qadamyn jasaǵan balalardyń ishinde taldyqorǵandyq ustazdar otbasy Nurjan Qamıev pen Gúlnur Dáýrenbekovanyń da kenjeleri bar.
«Bir jasar balamyzdy osy aıtýly is-sharaǵa arnaıy alyp keldik. Eki qyzdan keıin dúnıege kelgen ulymyzǵa Murager dep at qoıǵanbyz. Muragerimiz Taldyqorǵan qalasyndaǵy №14 balabaqshanyń «Balapan» tobyna baryp júr. Naýryzdyń onkúndigi aıasynda osy úlken aýqymdaǵy tusaýkeserde sábıimizdiń ómirge alǵash qadam jasaǵanyn jaqsy yrymǵa balaımyz. Ulymyzdyń aldaǵy joly ashyq, bolashaǵy jarqyn bolady dep senemiz. Naýryzdy osylaı on kún boıy ulttyq mazmunda atap ótý bastamasyn qoldaımyz», dedi qýanyshtan tolqyǵan ata-ana.
Jetisý oblysy
