Búgin Torǵaıdan Aqkólge qaraı shyǵyp edik, 40 shaqyrymnan ári júre almaı orta joldan keri qaıttyq. Odan Kólqamys, Aralbaı, Kókalatqa qaraı burylyp edik, Aralbaıdyń tusynda irkildik. Búgin saǵat onǵa deıin ashyq turǵan joldy eki jerden sý jyryp ketken. Sýdyń ekpini qatty. Kóterme joldyń ústinen asyp aǵyp jatyr. Eni 200 metrdeı bolady.
Kólqamys aýylynda 28 úıge sý kirip ketken. Aýdan ákimi sý tasqyny tónip turǵan eldi mekenderden 250 adam evakýasııalanǵanyn aıtty. Olar Torǵaı, Arqalyqtaǵy týys-týǵandarynyń úıine ornalasqan. Aýdan ortalyǵy Torǵaıda eki evakýasııalyq ortalyq, eriktiler shtaby jumys istep jatyr. Keshe túnde Májilis depýtaty Erkin Ábil bastaǵan Amanat partııasynyń ókilderi Torǵaıǵa úlken júk kóligimen gýmanıtarlyq kómek ákeldi.
Aýdan 5 kúnnen beri jaryqsyz otyr. Uıaly telefon baılanysy birde bar, birde joq. Amangeldi men Torǵaıdyń arasyndaǵy jolda belýardan sýǵa malshynyp, qulaǵan baǵandardy turǵyzyp, úzilgen symdardy jalǵap, jantalasyp júrgen energetık mamandardy kórdik.
«Qazir jaǵdaı kúrdeli. Osydan 4-5 kún burynǵy jaǵdaı aımaǵymyzda jatqan qardyń erýinen bolsa, qazir syrttan kelip jatqan tasqyn sý aýdan aýmaǵyn basyp ótip jatyr. Kóp bolyp jumylyp, sý tasqynyna qarsy kúresip jatyrmyz. Jaǵdaı saǵat saıyn qubylyp tur. Eń bastysy - eldiń amandyǵy. Jan-jaqtan aǵylyp kómekke kelip jatqandar kóp», dedi Jangeldın aýdanynyń ákimi Shota Ospanov.
Torǵaıda jańa ǵana jaryq jandy. Jarkól aýylyna sý kirdi degen sýyt habar jetti.
