Mıýnhendik «Navel Robotics» startaby qarttar úıinde paıdalanýǵa arnalǵan robot-nemerelerdi oılap tapty. Bul jasandy ıntellektiniń ereksheligi – egde jastaǵy adamdarǵa qolǵabys jasaıtynynda. Iаǵnı qarııalarmen kádimgi qurdasyndaı syrlasady, dári-dármektiń ýaqtyly qabyldanýyn qadaǵalaıdy, tipti áńgimege saı ázil aıtyp, ata-ájelerdiń kóńilin kóteredi. 70 santımetrlik elgezek «nemere» aptasyna jeti kún, táýligine 24 saǵat toqtaýsyz qyzmet edi. Biraq sonda da jumysynan keshikpeıdi, eshqashan renjimeıdi jáne eshkimnen alǵys dámetpeıdi. Jobanyń negizin qalaýshy Klod Týssen jańa robottyń egde jastaǵy adamdar arasynda tez tanymal bola bastaǵanyn, oǵan turǵyndar úlken qyzyǵýshylyq tanytyp jatqanyn atap ótti. Ertegidegi Djepetto aqsaqaldyń aǵashtan qýyrshaq-bala jasap alatyny esińizde shyǵar? Artynsha Pınokkıo dep at qoıǵan qýyrshaǵy shynaıy balaǵa aınalyp, ákesiniń kómekshisi bolady. Erteginiń shynǵa aınalǵanyna kózimiz jetip otyr.
Kezdeısoqtyq pa, álde...
Adamzat tarıhynda tańdaı qaqtyrarlyq talaı oqıǵa bolǵan. Sonyń biri – 1966 jyly jaǵajaıda bolǵan jaǵdaı.
Rodjer Lozer esimdi tórt jasar bala Amerıkanyń Salem qalasynyń mańaıyndaǵy teńizde shomylyp júrgende, kenet sýǵa ketip qala jazdaǵan. Biraq ketpedi. Baqytyna oraı, ony Elıs Bleız atty áıel qutqaryp qalǵan. Endi myna qyzyqqa qarańyzshy. Arada segiz jyl ótedi. Rodjer 12 jasqa kelgende dál osy Salem qalasyna qaıtadan joly túsip, teńiz jaǵasynda júrgende, sýǵa batyp bara jatqan bir er kisini kózi shalyp, jaǵaǵa alyp shyǵady. Keıin surasa kelgende, ol er adam baıaǵy ózin qutqarǵan áıeldiń kúıeýi bolyp shyqqan eken.
Eń alyp ushaq
Amerıkalyq «Radia» kompanııasy júk tasymaldaıtyn álemdegi eń úlken ushaq jasap jatyr.
Kolorado shtatyndaǵy startap jobany «WindRunner» dep atady. Qazaqshalasaq, «jelmen jarysatyn» alyp ushaqtyń uzyndyǵy – 109 metr ( fýtbol alańynyń uzyndyǵyndaı), qanatynyń keńdigi – 79,6 metr bolmaq. Sonymen qatar ol 80 tonnaǵa deıingi júkti tasymaldaı alatyn múmkindikke ıe. Bul degenimiz úsh olımpıadalyq júzý basseıni syıyp ketetindeı jetkilikti kólem. Salystyryp aıtsaq, ázirshe eń alyp degen «Boıng 747» ushaǵynan 12 ese kóp kórsetkish.
