Senbi kúni Premer-mınıstrdiń birinshi orynbasary Roman Sklıar Batys Qazaqstan oblysyna issaparmen kelip, oblys ákimi Narıman Tóreǵalıevpen birge sý tasqyny bolǵan aýmaqtardy tikushaqpen aralap, jaǵdaıdy óz kózimen kórdi.
Úkimet basshysynyń orynbasary kólemi jaǵynan aýqymdy sý tasqyny bolǵan Terekti, Syrym, Qaratóbe aýdandarynyń aýmaǵyn kórdi. Oblys ákimi Narıman Tóreǵalıev tasqynnyń aldyn alýǵa, halyqty qaýipsiz jerge kóshirý baǵytynda atqarylyp jatqan jumystar týraly aıtty.
Oblystyń Terekti, Syrym, Qaratóbe, Bórli aýdandarynda, sondaı-aq Oral qalasynda tasqynǵa baılanysty tabıǵı sıpatta tótenshe jaǵdaı jarııalanǵan. Sý basqan aýmaqtar kóp mólsherdegi jaýyn-shashynnyń saldarynan ulǵaıa túsken. Qazirgi ýaqytta turǵyndar qaýipsiz jerge kóshirilip jatyr. Sońǵy derekterge qaraǵanda jalpy sany 1 122 adam evakýasııalyq pýnktke jetkizilgen, úı janýarlary qaýipsiz aýmaqtarǵa aıdalǵan.
Batys Qazaqstan oblysynda sý tasqyny saldarymen Tótenshe jaǵdaılar departamentiniń jeke quramy, jergilikti atqarýshy organdar, Qorǵanys mınıstrligi men Ishki ister mınıstrliginiń mamandary kúresip jatyr. 306 tehnıka men 146 motosorǵy osy iske jegilgen. Sondaı-aq Mańǵystaý oblysynyń jáne Tótenshe jaǵdaı mınıstrligi áskerı bólimderiniń kúshteri tartyldy. Qosymsha UQK Shekara qyzmetiniń MI-8 eki tikushaǵy kómekte júr.
О́ńirde arnaıy komıssııa qurylyp, keltirilgen zalaldy esepteý bastaldy. Roman Sklıar barlyq baǵyt boıynsha sý tasqynyna qarsy jumysty kúsheıtýdi tapsyrdy. «Úkimet tarapynan barlyq qajetti kómek kórsetiledi», dedi Premer-mınıstrdiń birinshi orynbasary.
Shyńǵyrlaý ózeniniń deńgeıiniń kóterilýine baılanysty eldi mekenderdi sý basý qaýpi týyndady, qazirgi ýaqytta Bórli aýdanynyń Aqsý jáne Keńtúbek aýyldarynda 251 adam evakýasııalandy.
Batys Qazaqstan oblysyna jaǵdaımen jeke tanysý úshin vıse-mınıstr Erlan Nurpeıisov keldi. Parlament Májilisiniń depýtaty Nartaı Sársenǵalıev te apat aımaǵynda júr.
«Batys Qazaqstan oblysyna tabanym tıisimen tikushaqpen oblystyń sý basqan aýdandaryna, shalǵaı ortalyqtaryna baryp keldik. 692 myń adam turatyn Batys Qazaqstannyń sý basqan aımaqtaryndaǵy qatysty ahýal qıyn. Kún sanap jaǵdaı kúrdelenip barady. Qazirdiń ózinde oblysta 455 úıdi sý basqan, 22 ǵımarat sý astynda qalǵan. Qardyń erýi jáne jaýyn-shashynnyń saldarynan 17 áleýmettik jáne memlekettik mańyzy bar nysannyń jáne 5 kópqabatty turǵyn úıdiń jertólesin, sondaı-aq 460 jeke turǵyn úıdi jáne 99 turǵyn úıdiń aýlasyn sý basqan. Halyq qatty úreılenip qalǵan», deıdi depýtat.
Budan buryn habarlaǵanymyzdaı, Batys Qazaqstan oblysynyń Aqjaıyq, Jánibek, Terekti, Syrym, Qaratóbe, Shyńǵyrlaý, Bórli, Qaztalov aýdandarynda 17 avtojoldyń 37 bóligin sý basyp, qazir 4 aýdannyń 17 eldi mekenimen jol qatynasy úzilip otyr.
Batys Qazaqstan oblysyndaǵy sý tasqyny jaǵdaıyna baılanysty TJD psıhologteri evakýasııalyq pýnktterdegi zardap shekken halyqqa shuǵyl psıhologııalyq kómek kórsetip jatyr. Tótenshe jaǵdaı basqarmasynyń málimetine sáıkes Shaǵan, Derkól ózenderi sýynyń eń joǵary deńgeıge kóterilýine baılanysty saıajaı úıleriniń aýmaǵyn sý basýy múmkin. Osyǵan oraı ózen jaıylmalaryndaǵy saıajaı turǵyndaryna aldyn ala qaýipsiz jerge kóshý týraly eskertildi. Ýaqytsha turatyn úı-jaıy joq turǵyndarǵa evakýasııalyq pýnktter daıyndaldy.
Mamandar endigi qaýip Reseı aýmaǵynan keletin ózenderden kelýi múmkin ekenin aıtyp jatyr. Saratovmelıovodhoz basqarmasynyń málimetinshe, Qaraózen men Saryózen deńgeıi kúrt kóterilgen. Batys Qazaqstan oblysyna eń jaqyn Reseıdiń Prıýzen sý qoımasynan Qaraózenge sekýndyna 372 tekshe metr sý, al Varfolomeev sý qoımasynan Saryózenge sekýndyna 100 tekshe metr sý jiberilip jatyr eken. Osyǵan baılanysty oblys ákimi Narıman Tóreǵalıevtiń tapsyrmasymen jedel qaýipsizdik sharalary qabyldandy. Sý basý qaýpi bar aımaq turǵyndaryna qajet ýaqytta qaýipsiz jerge kóshýge daıyn bolýy eskertildi.
Batys Qazaqstan oblysy
