Oblystyq tótenshe jaǵdaılar departamentiniń bastyǵy Nurlan Jańabaevtyń aıtýynsha, bıyl Jaıyq ózenindegi sý deńgeıi normadaǵydan 270 sm-ge joǵary bolýy múmkin. Al Qyzylqoǵa, Jylyoı aýdandary aýmaǵymen ótetin Oıyl jáne Jem ózenderiniń basseınine keletin sýdyń mólsheri jyldaǵydan kóp bolatyny týraly málimet bar.
«О́ıtkeni atalǵan ózenderdiń bastaýy jatqan Aqtóbe oblysynda jaýyn-shashyn mólsheri kóp tústi. Sol sebepten 12 eldi mekendegi qorǵanys bógetterine 2021-2025 jyldary aralyǵynda kúrdeli jóndeý júrgizý jumysy josparlandy», deıdi N.Jańabaev.
Onyń málimetine súıensek, óńirde 31 gıdrotehnıkalyq nysan esepte tur. Munyń ishinde respýblıkalyq menshiktegi 1 sý toraby men 12 magıstraldy kanal bar. Al kommýnaldyq menshiktiń ıeligine 10 bóget pen 8 magıstraldy kanal alynǵan.
«Bıyl kóktemgi sý tasqynyna tosqaýyl qoıý úshin jergilikti bıýdjetten 2,4 mlrd teńge bólingen. Bul qarjynyń 1,4 mlrd teńgesi tótenshe rezerv qoryn qurasa, 1 mlrd teńge shuǵyl shyǵystarǵa jumsalady. Sý tasqynynyń zardaptaryn joıýǵa 17 tonna janar-jaǵarmaı, 485 tonna ınertti materıal, 25 myńnan asa qap, 69 shatyr, 5 myń kereýet pen tósektik oryn jabdyǵy, 190-nan asa qabyldaý beketi daıyndaldy. Sý tasqynymen kúreske 1 153 adam, 303 tehnıka, 16 júzý quraly men 107 motopompa daıyn tur», dedi N.Jańabaev.
«Jol aktıvteriniń ulttyq sapa ortalyǵy» RMK Atyraý oblystyq fılıalynyń dırektory Bekbol Muqashovtyń aıtýynsha, óńir aýmaǵymen tórt baǵytta respýblıkalyq mańyzy bar jol ótedi. Máselen, «Aqtóbe-Atyraý-Astrahan» tasjolyndaǵy Saǵyz ózeni ústinen salynǵan kópirdiń jaı-kúıine tekserildi. Mundaı tekserý «Dossor-Qulsary-Beıneý-Aqtaý» baǵytynda jolda Qursaı ózenindegi kópirge de júrgizildi.
«Qyzylqoǵa, Jylyoı aýdandary arqyly aǵatyn Jem ózeniniń tereńdigi 2 metrge jetken. Qazir sý ózenniń arnasymen aǵyp jatyr. Osy kezge deıin «Atyraý-Oral» tasjoly boıyndaǵy 25 sý ótkizgish qubyr tazartyldy. Al «Qajservıs» JShS-nyń Atyraý oblystyq fılıaly sý tasqynyna qarsy 250 tekshe metr qıyrshyq tas, 500 tonna qum, 3 motopompa, 3 qaıyq jáne 1 myń qap qum daıyndady. Bul materıaldar jol paıdalaný beketterinde saqtaýly tur», dep málimdedi Bekbol Muqashov.
Muǵaljar taýynan bastalatyn Oıyl ózeninen jyl saıyn qaýip tóndirip otyr. Birneshe jyl erneýi keýip, sońy qurǵaqshylyqqa ulasty. Al byltyrdan beri ózen arnasynan asqan tasqyn sý bir aýyldyń tún uıqysyn tórt bóldi. Bul – Qyzylqoǵa aýdanynyń ortalyǵy Mııaly aýyly. Aýdan ákimi Qanat Ázmuhanovtyń aıtýynsha, tasqyn sýǵa baılanysty 18 naýryzdan beri kezekshilik uıymdastyrylyp otyr. Al 23 naýryz kúni erigen qardyń saldarynan aýyl irgesindegi Qarasý jyrasynda sý deńgeıi kúrt kóterilgen. Sondyqtan sol mańda salynyp jatqan kópir qurylysy ýaqytsha toqtatyldy.
Qyzylqoǵa aýdany ákimdiginiń baspasóz qyzmeti málim etkendeı, tasqyn sýdyń saldarynan Mııaly aýylynan 500 metr qashyqtyqtan ótetin «Saǵyz-Mııaly-Qarabaý-Inder» baǵytyndaǵy joldyń aınalma tusy jyrylǵan. Sol sebepten birneshe okrýgtiń aýdan ortalyǵymen baılanystaratyn avtokólik qatynasy tolyqtaı toqtaǵan.
«Qazir Oıyl ózeniniń aýdan aýmaǵyndaǵy jaǵalaýyna jaqyn ornalasqan okrýg turǵyndary úshin 2 qaıyqpen tasymal uıymdastyrý qolǵa alyndy. Oıyl ózeniniń arnasynan asqan sý «Eraly» sý torabyna quıylyp jatyr. Sýdyń qazirgi deńgeıi – 3,2 metr», dep habarlady ákimdiktiń baspasóz qyzmeti.
Ákimdiktiń usynǵan aqparatyna qaraǵanda, aýdan aýmaǵyndaǵy bógettiń uzyndyǵy – 45,7 shaqyrym. Byltyrǵy kóktemnen beri 3 bóget, 1 ótkel qalpyna keltirilipti. Sondaı-aq Qarabaý, Taısoıǵan, Oıyl, Kózdiǵara jáne Saǵyz aýyldyq okrýgterinde 16 shaqyrym bóget jańadan soǵylǵan.
Atyraý oblystyq tótenshe jaǵdaılar departamenti 4 sýdan qutqarý jasaǵy men 25 qutqarýshyny Qyzylqoǵa aýdanyna kómekke jiberdi. Sondaı-aq jol talǵamaıtyn Trekol, Ýral, ÝAZ kóligi men 3 motorly qaıyq jetkizildi.
Qyzylqoǵa aýdanynyń ortalyǵy – Mııaly aýylyna Oıyl ózeninen tasqyn sýdyń kirý qaýpi týyndady. Osyǵan baılanysty aýdanda tótenshe jaǵdaı jarııalanyp, atalǵan aýyl turǵyndaryn qaýipsiz jerge kóshirýge sheshim qabyldandy.
Qyzylqoǵa aýdany ákimdiginiń málimetinshe, turǵyndardy qabyldaýǵa Mııaly aýylyndaǵy Y.Shórekov atyndaǵy mektep-gımnazııa, H.Dosmuhamedov atyndaǵy orta mektep pen «Nur-Shýaq» balabaqshasy daıyn tur. Turǵyndar aýdan ákimdigi, «Arman» mádenıet úıi men «Jańa arna» mekemesiniń ǵımaratyna jınalyp jatyr. Birinshi kezekte áıelder, balalar, naýqas adamdar, I, II, III-toptaǵy múgedekter kóshiriledi» dep habarlady aýdandyq ákimdikten.
Atyraý oblysy
