Bul týraly Qazaqstan Prezıdenti Qasym-Jomart Toqaev Qytaıdyń Haınan provınsııasynda ótken Boao Azııa forýmynda sóılegen sózinde aıtty.
«Ortalyq Azııada bıdaı óndirý boıynsha jetekshi el sanalatyn Qazaqstan óziniń aýyl sharýashylyǵy salasyndaǵy əleýetin jahandyq azyq-túlik turaqtylyǵyn qamtamasyz etý úshin paıdalanýǵa nıetti. Biz maqsatty baǵdarlamalar jasaý, birlesken agroınnovasııalyq ortalyqtar qurý jəne ınnovasııalyq tehnologııalar transferti arqyly halyqaralyq yntymaqtastyqty nyǵaıtýǵa tıispiz. Ol úshin kúsh jumyldyrýymyz kerek», dedi Prezıdent.
Tranzıt-kóliktik yntymaqtastyqty keńeıtý strategııasy
Qazaqstan kóshbasshysy Qasym-Jomart Toqaev Qytaıdyń Haınan provınsııasynda ótken Boao Azııa forýmynda Azııa elderi arasyndaǵy tranzıt-kóliktik yntymaqtastyqty keńeıtýdiń strategııalyq mańyzyna toqtaldy.
«Qoldanystaǵy jáne jańa kólik baǵyttaryn damytý úshin barynsha kúsh-jiger jumsaý asa mańyzdy. Transkaspıı halyqaralyq kólik baǵyty nemese «Orta dáliz» osy sanatqa jatady. Atalǵan kólik baǵdary Azııa men Eýropa arasyndaǵy jetkizý tizbeginiń qaýipsizdigin áldeqaıda tıimdi qamtamasyz etedi. Byltyr osy baǵyttaǵy júk tasymaly eki ese artyp, 3 mıllıon tonnaǵa jetti. Aldaǵy jyldary bul kórsetkish 10 mıllıon tonnaǵa jetedi degen boljam jasap otyrmyz. Sondaı-aq Qazaqstan «Soltústik – Ońtústik» dálizin damytýda kórshi eldermen yntymaqtastyq ornatýǵa daıyn», dedi Q.Toqaev.
Saýda rekordtyq kórsetkishke jetti
Qazaqstan Prezıdenti Qasym-Jomart Toqaev Boao Azııa forýmynyń HHIII sessııasynda Qazaqstan men Qytaıdyń ekijaqty taýar aınalymy tarıhı rekordtyq kórsetkishke jetkenin jarııalady.
Qazirgi kezde Qazaqstan Qytaıdyń Ortalyq Azııadaǵy negizgi saýda-ekonomıkalyq seriktesine aınaldy. «Qytaıdyń aımaqtaǵy saýda-sattyǵy men salǵan ınvestısııasynyń teń jartysy Qazaqstannyń úlesine tıesili. Byltyr Qazaqstan men Qytaı arasyndaǵy taýar aınalymy 41 mıllıard dollardy qurady. Bul – tarıhı rekordtyq kórsetkish», dedi Q.Toqaev.
Byltyr eki el arasyndaǵy júk tasymaly 22 paıyzǵa artyp, shamamen 30 mıllıon tonnaǵa jetti. Osy oraıda Prezıdent QHR tóraǵasy Sı Szınpınniń «Bir beldeý, bir jol» aýqymdy megajobasyn on jyldan astam ýaqyt buryn Qazaqstanǵa jasaǵan sapary kezinde tanystyrǵanyn da eske aldy. Atalǵan joba Shyǵys pen Batys arasyndaǵy negizgi kópir qyzmetin atqarady, al Qytaıdan Eýropaǵa qurlyq jolymen tasymaldanatyn júktiń 80 paıyzy Qazaqstan aýmaǵy arqyly ótedi.
«Bul mańyzdy artyqshylyqty biz tolyqqandy paıdalanýǵa tıispiz. Bizdiń óz ınvestısııamyz da «Bir beldeý, bir jol» bastamasymen strategııalyq turǵydan sabaqtas ári zamanaýı, mýltımodaldy, ekologııalyq turǵydan qaýipsiz jáne ornyqty ınfraqurylym qurýǵa baǵyttalǵan», dedi Prezıdent.
Qazaqstan KAIYI avtomobılderin shyǵara bastaıdy
Qazaqstandyq «Orbis Manufacturing» kólik kompanııasy Almatynyń ónerkásiptik aımaǵynda qytaılyq KAIYI brendimen avtomobıl shyǵaratyn tolyq sıkldi zaýyt salýdy josparlap otyr.
Astanadaǵy qazaqstandyq eksporttaýshylardyń ekinshi forýmynda «Orbıs Qazaqstan» enshiles kompanııasy qytaılyq «Yibin Kaiyi Automobile Co» kompanııasymen yntymaqtastyq týraly memorandýmǵa qol qoıdy.
«Biz jetekshi Qytaı brendteriniń joǵary tehnologııalyq avtomobılderin óndirýdi uıymdastyrýǵa shamamen 72 mlrd teńge (160 mln dollar) ınvestısııa salýdy josparlap otyrmyz», dedi «Orbıs Qazaqstan» kompanııasynyń prezıdenti Sýhrab Mahmýdov.
«Orbıs Qazaqstanda» qazir óndiristik jeliniń jobalaý-smetalyq qujattamasy boıynsha jumys aıaqtalyp jatyr. Zaýyttyń óndiristik qýaty jylyna 80,00 avtomobıl deńgeıinde josparlanǵan. Bastapqyda zaýytta 1500 jumys orny ashylady.
