Sózin barshany Kórisý kúnimen quttyqtaýdan bastaǵan Prezıdent el arasynda bul kúni elimizdiń batys aımaǵyna tán mereke degen túsinik bar ekenin, biraq bul qazaqtyń kóneden kele jatqan dástúri ekenin umytpaýymyz kerektigin aıtty. Tutas el bolyp, Naýryz meıramyn osy kúnnen, ıaǵnı Kórisý kúninen bastap toılaǵanymyz jarasymdy tirlik ekenin uǵyndyrdy.
Prezıdent: «Alǵashqy otyrys ult uıasy Ulytaý jerinde ótse, byltyr kıeli Túrkistanda jınaldyq. Búgin taǵy bir tarıhı ólke – Atyraý oblysyna kelip otyrmyz. Úshinshi otyrystyń Jaıyq jaǵasynda ótip jatqany tegin emes. Áıgili Saraıshyq qalasy osy jerge tıip tur. Bul shahar Ulyq ulystyń, keıin Qazaq handyǵynyń mańyzdy ákimshilik jáne saýda ortalyǵy bolǵany tarıhtan belgili», dep otyrystyń mán-maǵynasyn túsindirdi.
Quryltaıda Parlament jumysy men qoǵamymyzdyń ózekti máselelerin sheshý boıynsha qajetti zańdardy qabyldaý tájirıbesi de sóz boldy. Osy oraıda balalar men jastardyń densaýlyǵyna, ıaǵnı tutas ulttyń bolashaǵyna orasan zor zııan keltirip jatqan veıpterdiń taralýyna tosqaýyl qoıý úshin naqty mehanızmder engizilip otyrǵan zańnyń qaralý barysy sóz boldy. Bul zań Senattyń jalpy otyrysynda birqatar ózgerispen maquldandy.
Memleket basshysy atap ótken ózekti máseleniń biri – lýdomanııa, ıaǵnı qumarpazdyq. «Lýdomanııa – beıbit kúnde eldiń shyrqyn buzyp jatqan qater. Sonyń kesirinen talaı shańyraq shaıqaldy. Talaı azamat zań buzyp, qylmysqa uryndy. Qumar oıyn úshin qaryzǵa batyp, ózine qol jumsaǵan jandar týraly habarlar, ókinishke qaraı, kún saıyn tarap jatady. Bul dert jas urpaqqa óte úlken zııan keltiredi. Onlaın-oıyndar balalardyń kúndelikti ermegine aınalyp barady. Quzyrly organdar byltyr ınternet-kazınonyń belgisi bar 4 myńnan astam saıtty buǵattady», dep atap ótti Memleket basshysy.
Taǵy bir mańyzdy qundylyq bul – Zań jáne tártip. «Zań aldynda – bári birdeı. Bul – barshaǵa ortaq myzǵymas qaǵıda. Memleket júgensizdikke, tártipsizdikke jáne beıberekettikke eshqashan jol bermeıdi. Muny árbir azamat jete túsinýge tıis», deı kele Prezıdent barsha azamatty barlyq jerde, sonyń ishinde áleýmettik jelide de zańdy múltiksiz saqtaýǵa shaqyrdy.
Alısher SATYBALDIEV,
Senat depýtaty
