Foto: abaidan.kz
Atalǵan sanatqa jatatyn jumysshylar aı saıyn 208 myńnan 519 myń teńgege deıin tólem alýǵa quqyly.
Ataýly áleýmettik tólem (AÁT) ekonomıkanyń 19 salasynda, sonyń ishinde, taý-ken óndirý jáne óńdeý ónerkásibinde jumys isteıtin azamattarǵa beriledi.
Tólemniń bul túri Prezıdenttiń tapsyrmasy aıasynda 2024 jyldyń 1 qańtarynan bastap engizildi.
Buǵan deıin Biryńǵaı jınaqtaýshy zeınetaqy qory atalǵan áleýmettik tólemdi 2024 jyly 37 myńnan astam jumysshy alatynyn málimdedi. Qordyń esebinshe, kórsetkishter 2030 jyly – 58 myńnan, 2035 jyly – 95 myńnan asýy yqtımal.
Eńbek jáne áleýmettik qorǵaý mınıstrligi AÁT qandaı sharttarǵa sáıkes beriletinin túsindirdi.
«Ol zııandy jumystarda isteıtin nemese istegen adamdarǵa eki krıterıı boıynsha tólenedi. Birinshiden, 55 jasqa tolýy kerek. Ekinshiden, jumys berýshisi oǵan jalpy jıyntyǵynda keminde 84 aı, ıaǵnı 7 jyl mindetti kásiptik zeınetaqy jarnalaryn (MKZJ) aýdarýǵa tıis. Alaıda mundaı jaǵdaıda qaýipti jumystarda istegen, biraq jıyntyǵynda 84 aı MKZJ aýdarý faktisi joq jumyskerlerdiń úlken toby atalǵan tólemnen qaǵylyp otyr. Olardyń zııandy jumystardaǵy jalpy ótili keminde 12,6 jyldy quraıdy. Jumys ótili olardyń eńbek kitapshasymen rastalady», dedi Eńbekti qorǵaý basqarmasynyń basshysy Shalqar Orazbekov.
Qoǵamda densaýlyqqa zııan keltiretin qyzmette júrgenderge bóle-jara AÁT berý boıynsha narazylyq bildirý baıqalady. Eńbek mınıstrligi zııandy, qaýipti eńbek jaǵdaılarynda 12,6 jáne odan kóp jyl ótili bolǵan jáne AÁT alýǵa quqyly azamattardyń jańa tobynyń sany 2024 jyly 15 119 adamdy quraıtynyn jetkizdi. Olardy atalǵan tólemmen qamtý úshin bıýdjetten 7 mlrd 875,2 mln teńge shyǵys talap etiledi. Bul rette memleket tarapynan ár azamatqa beriletin tólem 2 eń tómengi kúnkóris deńgeıin (ETKD) nemese 86 814 teńgeni quraýy múmkin.
AÁT eń tómengi kúnkóris deńgeıi mólsheriniń ulǵaıýyna baılanysty kóbeıip otyrady.
