Balalar • 02 Sáýir, 2024

Aısáýle men Jansáýle sý tasqyny kezinde dúnıege keldi

180 ret

kórsetildi

1 mın

oqý úshin

Úkimet basshysy Oljas Bektenov sý tasqyny kezinde egiz sábı bosanǵan Qalamqas Qońyrqaevaǵa kómek kórsetken Yrǵyz aýdany Nura aýylyndaǵy dárigerlik ambýlatorııa qyzmetkerlerine alǵys bildirdi. Olar – Nura dárigerlik ambýlatorııasynyń jalpy tájirıbelik dárigeri – Saýııa Sataeva, meıirbıkeler – Aıjan Alhanova men Aıarý Molshylyq, dep habarlaıdy Egemen.kz.

Baıan QÝANDYQQYZY

Aısáýle men Jansáýle sý tasqyny kezinde dúnıege keldi

Foto: Densaýlyq saqtaý mınıstrligi

31 naýryz kúni aýdan ortalyǵynan 90 shaqyrym qashyqtyqta ornalasqan Nura aýylyna tasqyn sýdyń kelip qalǵany týraly habarlama túskende, aýyl jurty ábigerge tústi. Bul ýaqytta Yrǵyz ben Nura arasyndaǵy tasjoldy sý shaıyp, qatynas úzilgendikten, aýdandaǵy akýsher-gınekolog dárigerlerdiń Nuraǵa jetýi múmkin bolmady.

Ambýlatorııa qyzmetkerleri tájirıbeli dáriger Saýııa Sataevanyń basshylyǵymen anany aman-esen bosandyrdy.

Ile-shala nuralyqtardy evakýasııalaýǵa kelgen Qorǵanys mınıstrligine qarasty Aqtóbedegi T.Bıgeldınov atyndaǵy áskerı áýe kúshteri ınstıtýtynyń tikushaǵy anasy men sábılerdi aýdandyq aýrýhanaǵa jetkizdi.

Yrǵyz aýdandyq aýrýhanasynyń akýsher-gınekologi Kámshat Sársenǵalıevanyń aıtýynsha, qazir egizder men anasynyń jaǵdaıy jaqsy. Nárestelerdiń ekeýi de qyz bala, bireýiniń salmaǵy – 2800 g, ekinshisiniń salmaǵy – 3050 g.

Olar aýdandyq aýrýhanada tasqyn sýdyń beti qaıtqansha em alady. Kópbalaly ana Qalamqas Qońyrqaevanyń bul besinshi, altynshy sábıleri.