Foto: ua.tribuna.com
Ekinshi jartylaı jeńil salmaqtaǵy Dúnıejúzilik boks qaýymdastyǵy (WBA) jáne Halyqaralyq boks federasııasynyń (IBF) burynǵy chempıony Djervonta Devıske AQSh-tyń Merılend shtatynda izdeýge jarııalandy. Sportshy Maıamıdegi burynǵy qyzymen bolǵan turmystyq zorlyq-zombylyq isinen keıin shartty merzim talaptaryn buzdy degen kúdikke baılanysty, dep habarlaıdy ESPN quqyq qorǵaý organdaryna silteme jasap.
Baltımor qalasynyń sot bazasyna sáıkes, amerıkalyqqa qatysty qamaýǵa alý týraly order 24 sáýirden beri kúshinde. Buǵan deıin sot qorǵaýshy taraptyń sportshy polısııaǵa kómektesýge daıyn ekeni týraly málimdemesinen soń orderdi qaıtaryp alǵan bolatyn. Alaıda 22 mamyrda advokattardyń jańa ótinishi qabyldanbady. Eger Devısti tutqyndasa, ol kepilge bosatýsyz qamaýda bolady dep otyr.
Daýdyń basy 27 qazanda daıashy qyzǵa kúsh qoldanǵannan bastalady. Jábirlenýshiniń advokattary Devısten moraldyq jáne fızıkalyq zııan úshin qomaqty ótemaqy talap etti. 13 qańtarda Maıamı polısııasy boksshyny ustaýǵa order alǵany belgili boldy. 16 kúnnen keıin Devıs tutqyndaldy. Biraq 16 myń dollar kepilaqy tólep bostandyqqa shyqty. Buǵan deıin boksshy 2020 jáne 2022 jyldary da turmystyq zorlyq-zombylyq úshin eki ret qamaýǵa alynǵan edi.
Jeńilis kórmegen Devıs 30 jekpe-jekte qatarynan jeńiske jetti, al onyń 2025 jyly Lamont Roýchqa qarsy sońǵy aıqasy teń aıaqtaldy. Boksshylar revansh ótkizýi kerek edi, biraq Devıstiń zań aldyndaǵy máselelerine baılanysty jekpe-jek toqtatyldy.
