Foto: magnific.com
Almaty men Aqtaýda kosmetıkalyq operasııalardan keıin pasıentterdiń qaıtys bolýyna baılanysty jekemenshik klınıkalardy tekserý qalaı júrip jatqanyn Medısınalyq jáne farmasevtıkalyq baqylaý komıtetiniń tóraǵasy Baýyrjan Júsipov aıtyp berdi.
Mańǵystaýda máslıhat depýtaty plastıkalyq operasııa kezinde qaıtys boldy
4 sáýirde Mańǵystaý oblystyq máslıhatynyń burynǵy depýtaty, 49 jastaǵy Erbol Aıtýov «Qasıet» jekemenshik klınıkasyna júgingen. Er adamǵa lıposaksııa operasııasy jasalyp, sodan keıin ol komaǵa túsip, kóz jumǵan. Osy oqıǵadan keıin Medısınalyq jáne farmasevtıkalyq baqylaý komıtetiniń departamenti tekserý júrgizdi.
«Materıaldar quqyqtyq baǵa berý úshin prokýratýra men quqyq qorǵaý organdaryna tapsyryldy. Sondyqtan nátıjeleri olar qaraǵannan keıin jarııalanady», – dedi Júsipov Senat qabarǵasynda.
Komıtet tóraǵasy klınıka qyzmetinde qandaı da bir zańbuzýshylyqtar anyqtalǵan, anyqtalmaǵanyn naqtylamady.
Belgili kásipker ári bloger Sáýle Bazarhan plastıkalyq hırýrgııa klınıkasynda kóz jumdy
Kosmetıkalyq operasııadan keıingi taǵy bir ólim jaǵdaıy 15 mamyrda Almatyda tirkeldi. Klınıkada bloger ári kásipker Sáýle Ermahanova qaıtys boldy. Qazir bul mekemede de tekserý bastalǵan.
«Búginnen bastap arnaıy komıssııa Almatydaǵy osy jekemenshik klınıkaǵa kirip jatyr. Tekserý nátıjeleri boıynsha qosymsha aqparat beremiz... Biz komıssııa quramyn jasaqtadyq, onyń ishinde táýelsiz sarapshylar da bar. Olar barlyq isti, barlyq materıaldardy, sonyń ishinde medısınalyq tarıhty tolyq zertteıdi. Munda belgili bir rásimder bar», – dep túsindirdi Júsipov.
Júsipovtiń aıtýynsha, qazirgi ýaqytta Qazaqstanda plastıkalyq operasııa jasaıtyn shamamen 247 jekemenshik klınıka jumys isteıdi. Osy qaıǵyly oqıǵalardan keıin mınıstrlik profılaktıkalyq baqylaýdy kúsheıtýdi, sonyń ishinde lısenzııalyq talaptardyń saqtalýyn jáne mamandardyń oqytý sertıfıkattaryn tekserýdi josparlap otyr.
