Jastar resýrstyq ortalyǵynda jylý jınaýǵa 130 erikti járdemdesti. Atalǵan ortalyqtyń basshysynyń orynbasary Baǵlan Ilesov 10 tonnadaı materıaldyq kómek jınalǵanyn, osyndaı qıyn sátte judyryqtaı jumylǵan shymkenttikter azamattyq tanytqandaryn aıtady.
Sonymen birge sý tasqyny bastalǵan sátte «Ýasılá», «Janın» qaıyrymdylyq qorlary men «Azat nıýs» aqparat agenttigi birlesip megapolısten jylý jınaıtyn shtab ashqan. Kúni keshe olar da gýmanıtarlyq kómekti tasqynnan zardap shekken aımaqtarǵa jóneltti. «Ýásılá» qaıyrymdylyq qorynyń basshysy Kaıýmjan Abdýllaevtyń aıtýynsha, 1 fýra, 15 alfard avtokóligi Aqtóbe oblysyna jolǵa shyqty. Jylý jınasýǵa kómek bergender ishinde «Avtonur» men «Alash» bazarlarynyń járdemin erekshe atap ótti. Máselen, avtonurlyq saýdagerler eki gazel, alashtyqtar bir gazel avtokóligine sııatyn jap-jańa kıim-keshekter jıyp bergen. Qaıyrymdylyq qory áleýmettik jeli arqyly toptarǵa taratýdyń nátıjesinde halyq qoldan kelgenshe kómek berýge umtylǵan. Biri zattaı járdem kórsetse, ekinshisi aqshalaı aýdarǵan.
«Sý shaıǵan aımaqtarda da shtabymyz jumys istep jatyr. Ol jaqta da eriktilerimiz bar. Barǵan soń kóremiz, qaı óńir kóbirek zardap shekse sol jaqqa qaraı kómekti jóneltemiz. Ol Batys Qazaqstan nemese Qostanaı oblysy bolýy múmkin. Biz tótenshe jaǵdaı oryn alǵan aımaqtardan habar alyp turmyz. Qazirgi tańda ol jaqta azyq-túlik qory jetkilikti eken. Kıim-keshek te barshylyq. Endigi keregi jeke bas tazalyǵyna qajetti gıgıenalyq zattar eken. Joldyń kóbin sý shaıyp ketken. Kópirler ótýge jaramaıdy. Sondyqtan sýdyń ortasynda qalyp qoıǵan aǵaıynǵa jergilikti «Muǵjıza» qaıyrymdylyq qory motorly qaıyqtarmen kómekterimizdi jetkizedi», dedi K.Abdýllaev.
«Janın» qaıyrymdylyq qorynyń eriktisi Murat Pernebekov eki kúnnen beri kún-tún demeı qordyń shtabynda jumys istep jatqanyn aıtady. О́ziniń negizgi mamandyǵy – elektrık. Biraq bos ýaqytynda osyndaı qaıyrymdylyq qorynda járdemshi bolyp tegin kómektesedi. Eriktiniń málimdeýinshe, keıingi eki kúnde shtabta jumys kúsheıgen. О́ıtkeni jan-jaqtan kelip jatqan qaıyrymdylyq kómek kóp. Tipti jınastyryp, retteýge áreń úlgerip jatyr. Bul da bolsa, qıyn kezde jalǵyz qaldyrmaıtyn halqymyzdyń janashyr peıili bolsa kerek-ti.
«Eldiń sý tasqynynan qınalǵany júregime qatty batady. Bar dúnıeńnen, jıǵan-tergenińnen bir páste aıyrylyp qalý ońaı emes, árıne. Áıteýir bas aman bolsyn, soǵan da shúkirshilik deıik. Al ózim 3-4 jyldan beri erikti bolyp jumys isteımin. Budan maǵan eshqandaı paıda kelmeıdi. Biraq men munyń bárin eldiń razylyǵy úshin jasap jatyrmyn. Áıtpese mamandyǵym – elektrık. Sol kásibimmen shuǵyldanyp, paıda ústine paıda taýyp júre bersem de bolar edi. Biraq óz qamyńdy oılaı bermeı eldiń de muqtajdyǵyna kómektespeseń, nesine er-azamat bolyp júrmiz», dedi zattardy tası júrip bizben áńgimelesken erikti jas.
ShYMKENT
