Jıyndy QazUÝ basshysy Janseıit Túımebaev ashyp, Farabı eńbekterin tereń taldap, saralaý qazirgi farabıtanýshy ǵalymdardyń basty mindeti ekenin jetkizdi.
«Ál-Farabı fenomeni – shyn máninde teńdesi joq qubylys. Ábý Nasyr ál-Farabı – uly oıshyl ǵana emes, ol – adamzattyń rýhanı órleýine yqpal etken ǵulama ǵalym. El ǵalymdarynyń irgeli zertteýleri men izdenis jumystarynyń arqasynda Ábý Nasyr ál-Farabı esimi mádenı sımvolymyzǵa, oıshyl murasy túrki mádenıeti men rýhanııatynan bastaý alatyn qazaq mádenıetiniń qaınary retinde ulttyq maqtanyshymyzǵa aınaldy. О́tken ǵasyrdyń alpysynshy jyldary Aqjan Mashanı, Aǵyn Qasymjanov, Muqash Býrabaev, Ánýar Álimjanov, Muzaffar Haırýllaev, Aýdanbek Kóbesov, Artýr Sagadeev, Qubyǵul Jaryqbaevtar ál-Farabıdiń murasyn zerttep, nasıhattaý isine ushan-teńiz úles qosty. Endi aldyńǵy býyn farabıtanýshylardyń eńbekterin keıingi jas ǵalymdar jalǵastyrýy kerek», dedi rektor.
О́z kezeginde Túrkııa Respýblıkasynyń Almaty qalasyndaǵy bas konsýly Mýderrısoglý Evren «Ál-Farabı – túrki álemine ǵana emes, ıslam álemine ózińdik lep alyp kelgen tulǵa. Onyń eńbekteri men fılosofııalyq oılary áli kúnge deıin ózektiligin joǵaltqan emes. Sondyqtan Farabı eńbekterin, ǵylymı zertteýlerin jan-jaqty qarastyrý jumystary eshqashan toqtamaıdy dep sanaımyn. Osy turǵyda QazUÝ-da dástúrli túrde ótetin forým ál-Farabı murasyn jańa baǵytta zertteýge mol múmkindik beredi», dep atap ótse, «Ábý Nasyr ál-Farabıdi Iran halqy uly ǵulamalardyń biregeıi retinde jaqsy tanıdy. Oıshyl medısına, fılosofııa, ǵylym, bilim jáne basqa da salalar boıynsha belsendi jumys istedi. Onyń árbir oıy, pikiri, paıymy óte qundy. Ol arab tiliniń leksıkasyn nyǵaıtýǵa súbeli úles qosyp, ǵylymdy ilgeriletýge, adam sanasyn damytýǵa septigin tıgizdi», dedi Iran Islam Respýblıkasynyń Almaty qalasyndaǵy bas konsýly Faǵanı Mýhsın.
Ál-Farabı atyndaǵy QazUÝ-dyń Baspasóz qyzmetiniń málimetinshe, taǵylymdy basqosýda Túrik halyqtary fılosofııa qoǵamynyń Qazaq komıteti men oqý ordasy ǵalymdarynyń bastamasymen jaryq kórgen «Túrik fılosofııasynyń antologııasynyń» kóptomdyq kitabynyń tusaýkeseri ótti. Tórt tomdyq antologııaǵa Uly dalany kóne zamannan beri mekendep kelgen túrik halyqtary men ulystarynyń fılosofııalyq jáne dinı-mıfologııalyq dúnıetanymyna qatysty mátinder men olarǵa berilgen ǵylymı taldaýlar engizildi. Ál-Farabı eńbekteriniń toptamasy berilip, adamzat oıshyly ómir súrgen dáýirdegi túrik órkenıetiniń rýhanı bolmysy baıyptalǵan. Ǵulama ǵalymnyń túrik mádenıeti men fılosofııasyndaǵy orny men róli de baǵamdalǵan.
Jıyn barysynda Sırııanyń Qazaqstandaǵy qurmetti konsýly Dereh Samır, Nur-Múbarak Egıpet ıslam mádenıeti ýnıversıtetiniń rektory, professor Muhammed ál-Jındı, sheteldik ǵalymdar men farabıtanýshylar baıandama jasady.
Forým jumysy ary qaraı seksııalarda jalǵasty.
ALMATY
