Keshe keshki saǵat 20:30-da Qaratomar sý qoımasynan sekýndyna 3300 tekshe metr sý jiberile bastaǵan. Saldarynan Tobyl ózeni túnimen tasyp shyqty. Sýdyń qarqyny áli báseńdegen joq. Qala ákimi jaǵdaıdyń qıyn ekenin, biraq eń bastysy adam shyǵyny joq ekenin aıtty.
- «Mohıto» demalys orny, «Apelsın» SO, Tennıs ortalyǵy sýda qaldy. Sondaı-aq Qostanaıdyń shetindegi «Kolesnye rıady» eldi mekeninde 80 úıdi sý basty. Sý basqan úılerdiń sany artýy nemese osymen toqtaýy múmkin. Naqty aıta almaımyn. Ol jerden 6-7 kósheniń turǵyndary evakýasııalandy. Úı janýarlary da qaýipsiz jerge shyǵaryldy. Úsh birdeı baý-baqsha birlestigi sýda qaldy. Eń bastysy, adam shyǵyny joq. Biraq keıbir adamdar qaýipti tolyq sezinbeı, úı-jaılaryna oralyp jatyr eken. Olaı táýekel etýge bolmaıdy. Qaýipsiz oryndarda bolyńyzdar, - dedi ákim.
M.Júndibaevtyń aıtýynsha, Qostanaıda 754 adam evakýasıalanǵan. Onyń 31-i evakýasııalyq pýnktterge jaıǵassa, qalǵandary týys-týǵandaryna qonystanǵan.
«Táýelsizdik kóshesindegi ortalyq kópirde júk kólikteriniń júrýine shekteý qoıyldy. Tek jeńil kólikter júre alady. Alaıda kólik aǵyny tym kóp. Sol sebepti biz qala turǵyndarynan mańyzdy jumys bolmasa, qatynasty barynsha azaıtýdy suraımyz. Endi biz ınjenerlik jelilerdi qalypqa keltirýge jáne adamdardy evakýasııalaýǵa kúsh jumyldyramyz. Qosymsha Qostanaı aýdanyna da kómektesip jatyrmyz», dedi Marat Júndibaev.
Qostanaı oblysy
