Foto: AMANAT partııasynyń baspasóz qyzmetinen
Osynaý qıyn-qystaý kezeńde qazaq halqy bir jaǵadan bas, bir jeńnen qol shyǵaryp jatqany sál de bolsa janǵa jylýlyq uıalatady. Tasqynǵa baılanysty Abaı, Aqmola, Aqtóbe, Atyraý, Batys Qazaqstan, Qaraǵandy, Qostanaı, Pavlodar, Soltústik Qazaqstan, Ulytaý oblystarynda tótenshe jaǵdaı jarııalanǵany belgili. Basqa óńirlerdiń belsendi jaqsylary tus-tustan jylý jınap, qarjylaı bolsyn, zattaı bolsyn kómektesip jatyr.
Elimizge taǵy bir synaq bolǵan bul jaǵdaıdy baýyrlas elder de nazardan tys qaldyrmady. Máselen, jaqynda ǵana Qyrǵyz Respýblıkasy Qazaqstanǵa 15 fýra bastamashyl gýmanıtarlyq kómek joldady. Qyrǵyzstan mınıstrler kabıneti gýmanıtarlyq kómekke 40 mıllıon som bóldi.
Sý tasqyny saldarynan zardap shekken azamattarǵa arnalǵan júkti Qyrǵyz Respýblıkasy TJM vıse-mınıstri Ýrmatbek Shamyrqanov alyp júrdi.
Jambyl oblysyna jetken 15 fýranyń ishine azyq-túlik, kıim-keshek, tósek-oryn jabdyqtary, jylytqyshtar jáne basqa da qajetti zattar tıelgen. Endi bul gýmanıtarlyq júk Atyraý, Aqtóbe, Batys Qazaqstan jáne Qostanaı oblystarynyń turǵyndary arasynda bólinip, dereý jiberilip jatyr.
Búgin Túrkııa Respýblıkasynyń elshiligi Qazaqstandaǵy sý tasqynynan zardap shegip jatqan óńirlerge gýmanıtarlyq kómek jibergenin habarlady.
Al Almatydaǵy Túrkııanyń bas konsýly mogapolıstegi túrkııalyq kompanııalardy jınap, tótenshe jaǵdaı rejımi jarııalanǵan óńirlerge qajetti zattardy jiberdi.
Atalǵan qaıyrymdylyq is-sharasyna «Táýelsiz taýar óndirýshiler jáne kásipkerler assosıasııasy» QQ bastaǵan kompanııalar atsalysty. Túrkııa Respýblıkasynyń Almaty qalasyndaǵy Bas konsýly Evren Múdderrısoglý azyq-túlik ónimderi men kilemderden turatyn gýmanıtarlyq kómekti Almaly aýdanynyń komıýnıtı ortalyǵyna jetkizdi.
«Qazirgi ahýal bizdiń de qabyrǵamyzdy qaıystyryp otyr. Sel apatynan zardap shekken barsha aǵaıynmen árdaıym birgemiz. Olarǵa qymbatty Mýsıad músheleri, mesenattar gýmanıtarlyq kómek jóneltip jatyr. Gýmanıtarlyq kómek - 110 jáshik azyq-túlik jáne 40 dana kilemnen turady. Biz zardap shekken azamattarmen birgemiz», dedi Evren Múdderrısoglý.
Qazirgi ýaqytta 10 oblysta, atap aıtqanda: Aqmola, Aqtóbe, Atyraý, Qaraǵandy, Qostanaı, Pavlodar, Batys Qazaqstan, Soltústik Qazaqstan, sondaı-aq Abaı jáne Ulytaý oblystarynda tótenshe jaǵdaı rejımi saqtalyp otyr.
Avarııalyq-qutqarý jumystaryna 12 myńnan astam adam, 800-den astam tehnıka, 400-ge jýyq sý aıdaý jáne júzý quraly jumyldyryldy. Al qyzyl sý basqan aımaqtardan 70 myńnan astam adam evakýasııalandy.
