Álibek Náýtıev Atyraý oblysyndaǵy tasqyn sýǵa baılanysty jaǵdaımen tanysty. Ol tótenshe jaǵdaıǵa baılanysty tasqyn sýmen kúres jónindegi shtabtyń jumysyna qatysty. Depýtat Taldykól, Saraıshyq, Tańdaı, Esmahan, Kózdiqara aýyldary men Mahambet aýdanynda boldy.
«Jaıyq ózenindegi Batys Qazaqstan oblysy aımaǵynan kele jatqan tasqyn sý ekpini óte qatty. О́zen boıyndaǵy eldi mekender halqy tasqyn sýǵa qarsy jaǵany bekitý jumystaryn uıymdastyryp, tabandylyqpen kúresýde. Mahambet aýdanynda 17 eldi meken Jaıyq ózeni boıynda ornalasqan. Bizdiń shtab qajetti jabdyqtar jáne janar-jaǵarmaımen qamtý maqsatynda uıymdastyrý sharalaryn júzege asyryp jatyr. Tasqynnan qorǵaný jumystary barlyq eldi mekenderde júrgizilip jatyr. Degenmen áli de qosymsha tehnıka, qapshyq kerek», dedi senator Naýtıev.
Depýtat Shákárim Buqtuǵutov tasqyn sýǵa qarsy sharalarǵa kómek kórsetý úshin Shyǵys Qazaqstan oblysyna attandy. Depýtat Shemoıha aýdanynda jergilikti turǵyndarmen jáne aýdan basshylyǵymen kezdesip, aýdannyń negizgi sý aıdyny – Úbe ózeninniń ahýalyn tekserdi. Ol sondaı-aq Glýbokoe aýdanynda Beloýsov sý qoımasynyń jaǵdaıy men eldi mekendegi sý burý júıesin muqııat zerdeledi jáne, tótenshe jaǵdaılar qyzmetiniń daıyndyǵyna kýá boldy.
«Rıdder qalasynda ózenderdiń, bulaqtar men kanaldar arnalaryn tazartý boıynsha aıtarlyqtaı jumys atqaryldy. Ol jumystar aýqymdy tasqynnyn aldyn alýǵa kómektesti. Bul baǵytta jumysty jalǵastyrý kerek, óıtkeni erigen qar sýynyń ekinshi tolqyny men jaýyn-shashyn bolady. Osyǵan baılanysty tasqyn sýǵa qarsy aldyn alý sharalary boıynsha jumystardy kúsheıtý qajet», dedi senator.
