Foto: N.Baıbýlın
Kezdesýde Máýlen Áshimbaev Qazaqstan EQYU-ny qaýipsizdik pen yntymaqtastyqqa qatysty irgeli máseleler boıynsha sheshimder qabyldaý úshin tıimdi kópjaqty alań retinde qarastyratynyn aıtty.
«Qazirgi ýaqytta EQYU Uıym alǵash qurylǵan kezdegideı Shyǵys pen Batys arasyndaǵy «kópir» retinde mańyzdy mıssııa atqaryp otyr. Biz eýropalyq keńistiktegi negizgi saıası seriktesterimizdiń biri – EQYU Parlamenttik Assambleıasymen konstrýktıvti yntymaqtastyqty odan ári nyǵaıtýǵa múddelimiz. Qazaqstan Parlamentiniń depýtattary EQYU Parlamenttik Assambleıasynyń sessııalaryna, onyń komıtetteriniń jumysyna jáne baıqaý mıssııalarynyń quramyndaǵy mindetterge belsendi qatysyp keledi», dedi Máýlen Áshimbaev.
Sondaı-aq Senat Spıkeri búginde Ortalyq Azııa memleketteri arasyndaǵy qarym-qatynastar strategııalyq áriptestik pen odaqtastyqqa taban tireı otyryp, dáıekti túrde damyp kele jatqanyna nazar aýdardy. Atalǵan máselege Memleket basshysy erekshe kóńil bólip keledi. Taraptar óńirdegi yntymaqtastyqtyń joǵary deńgeıin Parlamentter arqyly da qoldap otyr.
«О́ńirlik jaqyndasý úrdisteri bizdiń elderimizdiń ulttyq múddelerine saı keledi. Sondaı-aq Ortalyq Azııanyń zor ekonomıkalyq jáne mádenı áleýetin iske asyrýǵa yqpal etedi. Memleket basshylary 2022 jyly Ortalyq Azııany HHI ǵasyrda damytýdyń dostyq, tatý kórshilik jáne yntymaqtastyq týraly shartyna qol qoıdy. Biz О́zbekstanmen, Qyrǵyzstanmen jáne Tájikstanmen yntymaqtastyq jónindegi ekijaqty parlamentaralyq komıssııalar aıasynda belsendi jumys istep kelemiz. Sonymen qatar jańa alań – Ortalyq Azııa memleketteriniń Parlamentaralyq forýmyn qurdyq. Forýmnyń alǵashqy otyrysy byltyr Qazaqstanda ótti», dedi Palata Tóraǵasy.
Máýlen Áshimbaev EQYU PA ókilderine Memleket basshysynyń bastamasymen Qazaqstanda júrgizilip jatqan reformalardyń iske asyrylý barysy týraly da aıtyp berdi.
Sonymen qatar Ortalyq Azııa elderindegi ekologııanyń jaı-kúıine, klımattyń ózgerýine, transshekaralyq ózenderge, sýarý, sý resýrstaryn únemdi paıdalaný jáne basqa da salalarǵa qatysty ózekti problemalar talqylandy. Atap aıtqanda, taraptar Aral teńiziniń ekojúıesin qalpyna keltirý jónindegi birlesken jobalarǵa jáne Palatanyń osy baǵyttaǵy zańnamalyq jumysyna erekshe nazar aýdardy.
О́z kezeginde EQYU PA ókilderi Qazaqstanda júrgizilip jatqan saıası jáne áleýmettik-ekonomıkalyq ózgeristerdiń mańyzyna toqtalyp, olardyń nátıjelerin joǵary baǵalady. Sondaı-aq aldaǵy ýaqytta parlamentaralyq yntymaqtastyq odan ári nyǵaıa túsetinine senim bildirdi.
