Foto: vıdeoskrın
Aına Mýsralımovanyń aıtýynsha, qazir Arshaly aýdanynyń turǵyndary úshin Astana sý qoımasy qaýip tóndirip tur. Ol jerden sekýndyna 300 tekshe metr sý tógiledi. Mundaǵy sý deńgeıi týraly esepter men basqa mańyzdy aqparat shtabqa eki saǵat saıyn habarlanady.
«Sý tasqynyna qarsy is-sharalar barysynda 226 myń tekshe metr erigen sý sorylyp, 850 myń tekshe metr qar shyǵaryldy. 106 birlik tehnıka jumyldyryldy. 38 myń qap jınaldy jáne tóseldi. Arshaly aýdanyndaǵy Jibek joly aýylynda jaǵdaı kúrdeli. Al Selınograd aýdanynan 474 myń tekshe metr qar shyǵaryldy, 22 km sý burý transheıalary salyndy, 32 km kanaldar men aryqtar tazartyldy. Shamamen 1,2 mıllıon tekshe metr erigen sý soryldy. 3 km jańa bógetter salyndy. Nura, Qozykósh, Qarasý, Muqyr, Esil ózenderiniń arnalary boıynsha jumys júrgizildi. 8 evakýasııalyq pýnkt daıyndaldy. 355 adam, 82 birlik tehnıka, 57 motopompalar jumyldyryldy», dep jazdy depýtat Facebook jelisinde.
Onyń aıtýynsha, áleýmettik jelilerde Talapkerdi sý basqany týraly habar tarady. Ol jaqta da qajetti sharalar qabyldandy. Aýyldyń aınalasynda 3 km qashyqtyqta ótetin úıindiler men kanaldy nyǵaıtý boıynsha qajetti jumystar júrgizildi, 7 myń qap tóseldi.
«Tutastaı alǵanda, jaǵdaı turaqty, biraq egistikterde jatqan qalyń qar endi erı bastady, jańbyr da jaýdy. Sý tasqynyna qarsy is-sharalarǵa qatysqan adamdarǵa: kent ákimdiginiń qyzmetkerlerine, TJD ókilderine, áskerı qyzmetshilerge, eriktilerge alǵysymdy bildiremin. Talapker turǵyndarynyń aýyzbirshiligi mol, tatý-tátti eken», dep jazdy ol.
