Elimizdiń joǵary oqý oryndary arasynda tuńǵysh ret iske qosylyp jatqan bul ortalyq sońǵy úlgidegi teleskoptar arqyly tańǵajaıyp aspan álemimen tanysyp, zertteý jumystaryn júrgizýge mol múmkindik beredi.
Ashylý rásimine QR Ulttyq ınjenerlik akademııasynyń prezıdenti Baqytjan Jumaǵulov, QR Ǵylym jáne joǵary bilim mınıstrligi Ǵylym komıtetiniń tóraǵasy Ǵalymjan Janqýatov, Ál-Farabı atyndaǵy QazUÝ-dyń Basqarma Tóraǵasy – Rektory Janseıit Túımebaev, Almaty qalasy kreatıvti ındýstrııa basqarmasynyń basshysy Qaısar Sarybaev, otandyq jáne sheteldik ǵalymdar, oqytýshy-professorlar quramy men bilim alýshy jastar qatysty.
Saltanatty sharada Janseıit Túımebaev ámbebap nysan ǵalymdar men stýdentterdiń ǵylymı jańalyqtaryn jáne ǵarysh álemindegi beımálim qupııalardyń syryn ashatyn ǵylymı ortalyq bolatynyn atap ótti.
«Farabı» observatorııasy stýdentterge tájirıbelik sabaqtar ótkizýge, jas ǵalymdardyń ǵylymı zertteýlermen aınalysýyna arnalǵan. Jańa nysanda bilim alýshylar aspan denelerin baqylaı alady. Bul bastama ǵaryshty zertteı otyryp, adamdardyń oı-órisin damytýǵa yqpal etedi. Derekterdi óńdeý, jınaý jáne taratý, qashyqtan basqarý, fotometrlerdi qoldaný tájirıbesi jastardyń ǵylymı-zertteý jumystarynyń nátıjesin joǵarylatyp, aldaǵy ýaqytta iri teleskoptarmen jumys isteýlerine jol ashady», dedi rektor.
Atalmysh nysan optıkasynyń dıagonaly 12 dıýım jáne fokýstyq uzyndyǵy 3048 mm bolatyn «Meade LX90-ACF oqý» teleskopymen jabdyqtalǵan. Sonymen qatar munda qoldanbaly teleskoptyń úsh túri qoıylǵan. Teleskoptar Satýrn, Mars, Iýpıter ǵalamsharyn jáne olardyń serikterin, juldyzdardy, Aıdy, Kún júıesindegi ózge planetalardy, jaqyn ǵaryshtyq denelerdi baqylaýǵa múmkindik beredi.
Aldaǵy ýaqytta observatorııada stýdentter úshin tájirıbelik sabaqtardyń bir bóligin ótkizý josparlanyp otyr. Bul tásil bilim alýshylarǵa dalalyq jaǵdaıda bilimderin shyńdaýǵa jáne erkin formatta sabaq oqýlary úshin tıimdi bolmaq.
Dızaıny kúmbezdi shatyr retinde jasalǵan «Farabı» observatorııasy QazUÝ qalashyǵyndaǵy Ál-Farabı kitaphanasynyń aldyndaǵy ashyq alańǵa ornalastyrylǵan.
