«Farabı» observatorııasy

Halyqaralyq ǵarysh pen ǵylym kúni­ne oraı  ashylǵan orta­lyq­ sońǵy úlgidegi teleskoptar arqyly tańǵajaıyp aspan ále­mimen tanysyp, zertteý ju­my­syn júrgizýge múmkindik beredi.

Ashylý rásimine Ulttyq ınjenerlik akademııasynyń prezıdenti Baqytjan Juma­ǵulov, Ǵylym jáne joǵary bilim mınıstrligi Ǵylym komıtetiniń tóraǵasy Ǵalymjan Janqýatov, Ál-Farabı atyndaǵy QazUÝ-dyń basqarma tóraǵasy-rektor Janseıit Túımebaev, Almaty qalasy kreatıvti ındýstrııa basqarmasynyń basshysy Qaısar Sarybaev, otandyq jáne sheteldik ǵalymdar, oqytýshy-professorlar quramy men bilim alýshy jastar qatysty.

Saltanatty is-sharada Jan­seıit Túımebaev ámbebap nysan ǵalymdar men stýdentterdiń ǵylymı jańalyqtaryn jáne ǵarysh álemindegi beı­málim qupııalardyń syryn ashatyn ǵylymı ortalyq bola­tyndyǵyna toqtaldy.  Rek­tor­dyń aıtýynsha, «Farabı» obser­vatorııasy stýdentterge tájirıbelik sabaqtar ótki­zýge, jas ǵalymdardyń ǵylymı zertteýlermen aınalysýyna arnalǵan. Jańa nysanda bilim alýshylar aspan denelerin baqylaı alady. Derekterdi óńdeý, jınaý jáne taratý, qashyqtan basqarý, fotometrlerdi qoldaný táji­rı­besi jastardyń ǵylymı-zert­­teý jumystarynyń nátı­je­sin joǵarylatyp, aldaǵy ýaqytta iri teleskoptarmen jumys isteýlerine jol ashady.

«Farabı» ortalyǵy optıka dıagonaly 12 dıýım jáne fokýstyq uzyndyǵy 3048 mm bolatyn «Meade LX90-ACF oqý» teleskopymen jabdyqtalǵan. Sonymen qatar munda qoldan­baly teleskoptyń úsh túri qoıylǵan. Teleskoptar Satýrn, Mars, Iýpıter jáne olardyń serikterin, juldyzdardy, Aı, Kún júıesindegi ózge planetalardy, jaqyn ǵaryshtyq dene­lerdi baqylaýǵa múmkindik beredi.

Observatorııada stýdentter úshin tájirıbelik sabaq ótkizý josparlanǵan. Bul ádis bilim alýshylarǵa dalalyq jaǵdaıda bilimderin shyńdaýǵa, erkin formatta sabaq oqýlary úshin tıimdi bolmaq.

Dızaıny kúmbezdi shatyr retinde jasalǵan «Farabı» obser­vatorııasy QazUÝ qala­shyǵyndaǵy Ál-Farabı kitap­hana­sy aldyndaǵy ashyq alańǵa ornalastyryldy.

ALMATY