Kaspi.kz Dırektorlar keńesiniń tóraǵasy jáne negizin qalaýshylardyń biri Vıacheslav Kım:
«Baspanasyz qalǵan adamdar úshin búkil elimizben birge ýaıymdaımyz. Myńdaǵan otbasy kóshirildi, olar óz úılerine qashan oralatyny belgisiz. Keıbir eldi mekenderde sý áli de kóterilip jatyr. Bul apat eshkimdi beıjaı qaldyrmaıdy. Memleket, bıznes jáne bizdiń azamattar zardap shekken aımaqtardaǵy adamdardyń ómirin qalpyna keltirý úshin baryn salyp jatyr. Biz Memleket basshysynyń zardap shekkenderge kómek kórsetý týraly shaqyrýyna qoldaý kórsetip, sý tasqynynyń saldaryn joıýǵa 20 mıllıard teńge baǵyttaımyz».
Kaspi.kz Basqarma tóraǵasy jáne negizin qalaýshylardyń biri Mıhaıl Lomtadze:
«Zardap shekken aımaqtarda bizdiń súıikti klıentterimiz, seriktesterimiz, qyzmetkerlerimiz turady. Biz sý tasqynynyń alǵashqy kúnderinen bastap olarmen únemi baılanystamyz jáne jaǵdaıdy jaqsy bilemiz. Biz birden Kaspi.kz mobıldi qosymshasynda qaıyrymdylyq kómegin jınaýdy uıymdastyrdyq jáne Biz Birgemiz Qazaqstan qoryna qutqarý tehnıkasyn, jabdyqtar amýnısııasyn, janarmaı jáne basqa da alǵashqy kómekke qajetti zattardy satyp alýǵa qarajat aýdardyq. О́kinishke qaraı, birqatar aımaqtarda jaǵdaı áli de kúrdeli. Biz Prezıdenttiń bastamasyn qoldaý jáne osynaý qıyn sátte elge paıdaly bolý - azamattyq boryshymyz dep esepteımiz».
Aıta keteıik, naýryz aıynyń sońynda Kaspi komandasy Kaspi.kz qosymshasynda onlaın-qyzmet uıymdastyrdy. Onyń kómegimen jaǵdaıǵa beı-jaı qaramaıtyn árbir Qazaqstan azamaty zardap shekkenderge kómektesý úshin Biz Birgemiz Qazaqstan qoryna qarajat aýdara alady.
Kaspi.kz kompanııasynyń ózi joldardy jóndeýge, qutqarý tikushaqtarynyń jumysyn qamtamasyz etýge, generatorlardy, sorǵylardy, úrlemeli qaıyqtardy jáne dári-dármekterdi satyp alýǵa 620 mln teńge baǵyttady. Sondaı-aq ótken aptada Vıacheslav Kım Aqmola oblysynda 5 qabatty turǵyn úı qurylysynyń jobasyn qarjylandyryp, zardap shekken eldi mekenderdiń ınfraqurylymyn qalpyna keltirýge qarajat bólgenin aıta ketý kerek.
